د ميدان وردګ ولایت د محاکمو په حکم (١٠) متهمینو ته تعزیري سزا ورکړل شوه
د میدان وردګ ولایت د چک ولسوالۍ د ابتدائيه محکمې (۹) متهمينو او د یاد ولایت ښاري محکمې لخوا يو تن متهم ته تعزيري سزا ورکړل شوه.
نن چهارشنبه د ۱۴۴۵هـ ق کال د شعبان المعظم د میاشتې ۲۴مه نېټه د ميدان وردګ ولایت د مرافعه محکمې لخوا لسو (۱۰) تنو متهمينو ته په عام محضر کې د زنا، لواطت او بد اخلاقۍ په تور تعزيري سزا ورکړل شوه.
ياد متهمين چې دوه ښځې او اته نارینه وو، د خپل بند موده يې مخکې تېره کړې وه.
په دې موخه جوړه شوې غونډه کې د ميدان وردګ ولايت د مرافعه محکمې رئيس محترم مولوي عبدالکریم (حقاني)، د ولايت مقام د دفتر رئیس مفتي محمد ظابط (حارث)، د ياد ولايت د علماوو شورا رئيس محترم شیخ سيد محمد عابد (آغا)، د اطلاعات او کلتور رئيس مولوي حبيب الله مجاهد (اخندزاده)، د چک ولسوالۍ د ابتدائیه محکمې رئيس مولوي عبدالصمد (فياض)، د یاد ولایت منسوبينو او عامو هېوادوالو ګډون کړی وو.
يادې غونډې ته د ميدان وردګ ولايت د مرافعه محکمې رئيس مولوي عبدالکريم حقاني صاحب په وينا کې وويل، چې حدود او قصاص د الله تعالی د رحمت ذريعه ده، چې په تنفيذ سره يې امن او خوشالي رامنځته کېږي. محترم حقاني زياته کړه، د حدودو او تعزيراتو په تطبيق سره د پېښو ګراف را ښکته کېږي او جنايي جرمونه ختميږي، څوک بیا زړه نه ښه کوي چې جرم وکړي او اسلامي امارت د حدودو او تعزيراتو ترسره کېدو ته ژمن دی.
د چک ولسوالۍ د ابتدائيه او ښاري محاکمو يادې پرېکړې د ميدان وردګ ولایت د مرافعه محکمې او د مرکزي تميز د جزا دېوان له تائید وروسته نن ورځ پر متهمينو تطبيق شوې.
