د کونړ ولایت مرافعه محکمې مسؤولينو په هڅو د قتل موضوع حل شوه
د کونړ ولایت مرافعه محکمې مسؤولینو په دوامداره هڅو او قومي مشرانو په منځګړیتوب په ۱۹/ ۱۱/ ۱۴۴۶هـ ق نېټه د قتل یوه موضوع چې یو کال مخکې د غازيآباد ولسوالۍ اړوند رامنځته شوې وه؛ حل او فصل شوه.
د قتل دغه موضوع چې د غازيآباد ولسوالۍ اړوند د دوو کورنیو ترمنځ رامنځته شوې وه؛ د مرافعه محکمې سرپرست رئیس مولوي لعل محمد (صدیقي)، د ښاري ابتدائیه محکمې سرپرست رئیس مولوي رحمت الله او نورو مسؤولینو او قومي مشرانو په ډېرو هڅو او ترغيب حل او فصل شوه.
په دې موخه جوړه شوې غونډه کې ګډونوالو په خپل وار د موضوع او د نظام د بقا اړوند هر اړخيزې ويناوې وکړې.
ورپسې غونډه کې اصلاحي فيصله واورول شوه، دواړه لوري په فیصله راضي شول، یاده موضوع د دواړو لوریو په رضايت او خوشحالۍ پای ته ورسېده او يوه کلنه دښمني يې په دوستۍ بدله شوه.
د غونډې په وروستيو کې قومي مشرانو او دواړو کورنيو د مسؤولينو د هڅو ستاينه وکړه او د الله (جلجلاله) له درباره ورته د مزيد خدمت د توفيق غوښتنه وکړه.
غونډه د ښاري ابتدائیه محکمې سرپرست رئیس په دعا پای ته ورسېده.
