د لغمان مرافعه محکمه کې د دعوت او ارشاد څانګه پرانيستل شوه
د ۱۴۴۵هـ ق کال د جمادي الاولی میاشتې په ۱۶مه نېټه د لغمان ولایت مرافعه محکمه کې د سترې محکمې عالي مقام د دعوت او ارشاد رياست له لوري د دعوت او ارشاد څانګه د یوې غونډې په ترڅ کې رسماً پرانیستل شوه.
د دعوت او ارشاد څانګې د پرانیستې غونډه چې د سترې محکمې عالي مقام د دعوت او ارشاد رياست د رئیس حافظ مولوي عبدالعزیز (ميوندي) په مشرۍ جوړه شوې وه، د لغمان ولایت د مرافعه او ښاري محاکمو ټولو قضائي، اداري، نظامي او خدماتي کارکوونکو په کې ګډون درلود، د قرآنکريم د څو مبارکو آياتونو په تلاوت پيل شوه.
ورپسې د دعوت او ارشاد ریاست مدرس محترم مفتي عصمت الله (برهان) د غونډې ګډونوالو ته عالمانه وینا وکړه، د الله تعالی د وحدانیت په اړه یې تفصیلي بیان وکړ، د اسلام مقدس دین په بهتروالي، د صحابه کرامو د اوصافو، د هغوی په عادتونو یې رڼا واچوله، قضاتو ته يې په خطاب کې وویل، چې د خلکو کارونه په صداقت، ایماندارۍ سره ترسره کړئ، هغه ورځ هېره نکړئ چې د الله تعالی په وړاندې به همداسې ودریږئ لکه څنګه چې نن ورځ ستاسو په وړاندې نور خلک ولاړ وي.
محترم مفتي برهان وویل، د افغانستان اسلامي امارت د الله تبارک و تعالی له لوري یو لوی انعام دی او د دغه نظام د بقا لپاره باید ټول پوره کوښښ وکړو.
نوموړي د غونډې په وروستۍ برخه کې د دعوت او ارشاد د چارو په اړه لازمه لارښوونه وکړه، کوم کتاب چې د یاد ریاست له خوا ترتیب شوی د تدریس په اړه يې رسمي وخت کې ګډونوالو ته لازم هدايات وکړل.
غونډه د دعاء په ویلو سره پای ته ورسېده.
