د زابل د مرافعه محکمې عمومي رئیس د شهر صفا ولسوالۍ له ابتدائیه محکمې څخه لیدنه وکړه
د ۱۴۴۵ هـ ق کال د جمادی الثانيه میاشتې په ۲۰مه نېټه د زابل ولایت د مرافعه محکمې عمومي رئیس محترم مفتي عبدالجلیل (سفیان) د مرافعه محکمې د امنیت عامه دېوان رئیس او د مدني دېوان د محرر په ملتیا د ياد ولایت د شهرصفا ولسوالۍ له ابتدائیه محکمې څخه لیدنه وکړه.
د دې ليدنې په پیل کې یاد پلاوي د شهرصفا ولسوالۍ د ابتدائیه محکمې له رئیس سره ناسته وکړه او د هيئتۍ پلاوي په اړه یې د تمیز د عالي مقام هدایت «باید د چارو د لا ښه سمون لپاره د ابتدائیه محاکمو څخه وخت پر وخت لیدنه ترسره شي» ورسره شریک کړ.
د ليدنې په دوام د یادې محکمې د رئیس لخوا د شهرصفا ابتدائیه محکمې اړتیاوې له یاد پلاوي سره شریکې شوې او د مرافعه محکمې د پلاوي لخوا د همکارۍ ډاډ ورکړل شو.
په دې ليدنه کې د مرافعه محکمې پلاوي د محکمې د اړوند بندیانو په اړه د محکمې له رئيس څخه معلومات وغوښتل، له بندیانو سره یې له نږدې خبرې وکړې او د دوی د وضعیت په اړه یې بشپړ معلومات ترلاسه کړل.
ورپسې یاد پلاوي د ابتدائیه محکمې د اداري او قضائي چارو ارزونه وکړه، د هغوی کارونه یې وستایل، د کارونو د لا ښه سمون او خپل مسؤولیت ته د متوجه کېدو په اړه يې ورته لازمې سپارښتنې وکړې.
د ليدنې په دوام یاد پلاوي د شهرصفا ولسوالۍ له ولسوال، استخباراتو مدیر او د یادې محکمې له غړيو سره ناسته وکړه، د ټولو ادارو ترمنځ يې د همغږۍ او یو له بل سره د همکارۍ په اړه ورته لازمې سپارښتنې وکړې.
دغه راز د یادو مسؤولینو له لوري د هر ډول اصولي همکارۍ ډاډ ورکړل شو او د ليدنې په پای کې د شهرصفا ولسوالۍ مسؤولینو او د محکمې غړيو د یاد پلاوي له ورتګ څخه مننه وکړه.
