د بغلان او سمنگان د نظامي محاکمو امنیتي او اجرائیوي قوماندانۍ لپاره د نوي ټاکل شوي قوماندان د معرفت غونډه وشوه
د قضائيه قوې د محاکمو امنيتي او اجرائيوي چارو عمومي ریاست د نظامي محاکمو د امنیتي او اجرائیوي قطعاتو عمومي قوماندانۍ اړوند د بغلان او سمنگان ولايتونو د نظامي محاکمو امنیتي او اجرائیوي قوماندانۍ د څانګې لپاره نوی ټاکل شوی قوماندان مولوي خان محمد (ناظم) په ۵/ ۳/ ۱۴۴۶ هـ ق نېټه د يوې غونډې په ترڅ کې د يادې قوماندانۍ مسؤولینو او منسوبینو ته ور وپېژندل شو او رسماً یې خپله دنده پيل کړه.
په دې موخه جوړه شوې غونډه کې د نظامي محاکمو امنیتي او اجرائیوي قطعاتو عمومي قوماندان حافظ حکمت الله (آغا ذهین)، د پېژند عمومي مدیر مولوي نور محمد (قتیبه)، د یاد زون د نظامي محکمې محرر مولوي عبدالله مسلمیار او يو شمېر نورو مسؤولینو او منسوبینو ګډون درلود.
یاده غونډه د قرآنکریم د څو مبارکو آیاتونو په تلاوت پیل شوه؛ ورپسې د یاد رياست د دعوت او ارشاد عمومي مدیریت مدرس مولوي عبدالله جان عابد وینا وکړه وویل، د نظام بنسټ په اطاعت را پيل شوی، الله تعالی په اطاعت سره کامیابي او بقاء درکوي، لازمه ده چې د خپلو مشرانو اطاعت وکړو، له بې اتفاقۍ، اختلاف او بې اعتمادۍ څخه ځانونه وساتو.
د غونډې په دوام د نظامي محاکمو امنیتي او اجرائیوي قطعاتو عمومي قوماندان حافظ حکمت الله آغا ذهین وویل، موږ باید د اسلامي نظام د ساتنې لپاره هر ډول سختي، تکلیفونه او ستړیاوې په سړه سینه وزغمو، ترڅو د الله تعالی او د نظام حق په کامله معنا ادا شي.
غونډه د دعا په ویلو پای ته ورسېده.
