د کندوز زون نظامي محکمې رئیس او د دغه ولايت د امنیه قوماندان په مشرۍ غونډه وشوه
د کندوز زون نظامي محکمې د رئیس محترم شیخ عبدالهادي (همت)، د یاد ولایت امنیه قوماندان الحاج پاسوال مولوي مطیع الله (سیف الله) په مشرۍ، د عالیقدر امیرالمؤمنین (حفظهاللهتعالی) د (۱۷) مې ګڼې فرمان پر اساس د یاد ولایت ښاروال، د منازلو د بررسۍ قضائي هیئت غړو، د امنیه قومانداني امنیتي چارو مرستیال، د مرکزي امنیتي حوزو آمرینو، قومي مشرانو او ګذر وکیلانو سره د غایبو، مفقودینو او ساعین بالفساد اشخاصو د منقول او غير منقولو ملکیتونو د بررسۍ په اړه، په ۲۰/ ۱۰/ ۱۴۴۷ هـ ق نېټه غونډه وشوه.
غونډه د قرآنکریم د څو مبارکو آیاتونو په تلاوت پیل شوه؛ وروسته د امنیه قوماندانۍ د امنیتي چارو مرستیال الحاج مولوي محمد رحیم (ذوالفقار) د ناستې ګډونوالو ته د ښه راغلاست تر څنګ د یادې غونډې موضوع واوروله.
ورپسې د کندوز زون نظامي محکمې رئیس ګډونوالو ته وینا وکړه وویل، زموږ د ناستې موخه د غایبو، مفقودینو او ساعین بالفساد اشخاصو د منقول او غیر منقولو ملکیتونو د بررسۍ په اړه د عالیقدر امیرالمؤمنین شیخ صاحب (حفظهاللهتعالی) د (۱۷) مې ګڼې فرمان چې په یوه مقدمه، شپږ بابونو، ۷ فصلونو او ۳۰ مادو کې توشېح شوی، پلې کول دي.
نوموړي زیاته کړه، دا زموږ او ستاسې د هر شخص مکلفیت دی، چې د عالیقدر امیرالمؤمنین (حفظهاللهتعالی) هر فرمان ته لبیک ووایو او په خپلو ورځنيو چارو کې یې تطبیق کړو.
د کندوز زون نظامي محکمې رئیس د ګذر له وکیلانو وغوښتل، چې د غایبو، مفقودینو او ساعین بالفساد اشخاصو د ملکیتونو د بررسۍ او تثبیت په برخه کې ستاسو همکاري د تل په څېر د مسؤولو اشخاصو په کار کې اسانتیا رامنځته کوي او په دې کار سره به د الله (جلجلاله) رضایت ترلاسه کړئ.
د ليدنې په دوام د ګذر وکیلانو په استازولۍ دوو کسانو خبرې وکړې وویل، چې په دې برخه کې د خپلو مسؤولینو سره هر ډول همکارۍ ته چمتو يو او دا کړنه یې خپل مسؤولیت وباله.
غونډه د دعاء په ویلو پای ته ورسېده.
