د روزګان ولايت مرافعه محکمې رئيس د یاد ولايت د چهارچينو او دهراود ولسواليو له ابتدائیه محاکمو څخه ليدنه وکړه

د روزګان ولایت مرافعه محکمې عمومي رئیس الحاج شیخ محمود (ابوالفیض)، د مرافعه محکمې مدني دېوان مفتي مولوي عبدالباري، د حقوقو آمر مولوي الله داد (عابد)، د یاد ریاست اجرائيه مدیر محب الله (نظری) په ملتيا، د ۱۴۴۷هـ ق کال د ذوالقعدة الحرم میاشتې په ۲۶مه او ۲۷ مه نېټه د چهارچینو او هراود ولسوالیو له ابتدائیه محاکمو څخه لیدنه وکړه.
 د مرافعه محکمې عمومي رئیس په یاده لیدنه کې د چهارچینو او دهراود ولسوالیو ابتدائیه محاکمو رئیسانو، قضائي غړو او اداري کارکوونکو ته د قضائي او اداري چارو د ښه ترسره کولو په برخه کې لازم هدایات وکړل وویل، د خلکو عرایضو ته دې په ټاکلي وخت رسېدنه وشي او د خلق الله کارونه دې په شفاف ډول په خپل وخت حل او فصل شي.
دغه راز نوموړي قضائي او اداري پرسونل ته د مراجعینو سره پر ښه سلوک، یو د بل په چارو کې مداخله نه کول، د فیصلې د ابلاغ او په خپل منځ کې د اتحاد او يووالي اړوند هم لازم هدایات او لارښوونې وکړې.
ورپسې یاد پلاوي د صادرې، واردې، رسیداتو، اندارج، عرایضو د ثبت او حاضرۍ کتابونه او جلب پاڼې وکتلې او په اړه يې اداري کارکوونکو ته لازمې لارښوونې وکړې.
د ليدنې په دوام د مرافعه محکمې رئيس د یادو ولسواليو له محبسونو ليدنه وکړه؛ د بندیانو غوښتنې يې واورېدې او ورته يې اصلاحي خبرې او بیان وکړ.
همداراز یاد پلاوي د نورو امارتي ادارو له مسؤولینو سره هم وکتل او په بېلا بېلو موضوعاتو يې ورسره خبرې او بحث وکړ.