د لوګر ولایت د مرافعه محکمې رئیس د یاد ولایت د ښاري محکمې له اجراآتو څخه لیدنه وکړه
په ۴ /۲ /۱۴۴۵ هـ ق نېټه د لوګر ولایت د مرافعه محکمې رئیس مولوي موسی کلیم "عاصم" د یاد ولایت د ښاري محکمې له ټولو دېوانونو څخه لیدنه تر سره کړه او د دوی قضائي او اداري اجراآت یې له نږدې ولیدل. د مرافعه محکمې رئیس په نوبت سره له جزا، مدني، عامه امنیت او ترافیکي پېښو دېوانونه له نږدې ولیدل او د یادو دېوانونو د فعالیتونو او کړنو څخه يې کتنه وکړه. نوموړي د حاضرۍ ، اندراج، واردې صادرې، رسیداتو، کتابونه وکتل او مسؤولینو ته یې د غوره او پر وخت اجراآتو هدایت وکړ. ورپسې د هر دېوان د قضائي اجراآتو ځینې نمونې وکتل شوې او د یادو فیصلو او اجراآتو په اړه د مرافعه محکمې رئیس له دوی سره خپل نظر شریک کړ. د ارزیابۍ په پای کې د مرافعه محکمې رئیس د ښاري محکمې د قضائي مسؤولینو هڅې وستایلې او دوی ته یې د مسؤولیتونو د ښه ترسره کولو دعا وکړه. د ښاري محکمې قضائي منسوبینو یاد راتګ مثبت وګاڼه او له عمومي رئیس څخه یې مننه وکړه چې تل یې دوی خپلو دندو ته تشویق کړي او د اړتیا پر مهال یې ورسره همکاري کړې ده.
