د زابل د مرافعه محکمې عمومي رئیس د ياد ولايت له ښاري محکمې لیدنه وکړه
د ۱۴۴۵ هـ ق کال د جمادی الثانيه میاشتې په ۱۳مه نېټه د زابل ولایت د مرافعه محکمې عمومي رئیس مفتي عبدالجلیل (سفیان) د مرافعه محکمې د جزا دېوان، د امنیت عامه دېوان د رئیسانو او د مدني دېوان د مفتي په ملتیا د یاد ولایت له ښاري محکمې څخه لیدنه وکړه.
د يادې ليدنې په پیل کې یې د ښاري محکمې له رئیس سره ناسته وکړه، د هيئتۍ په اړه یې د تمیز عالي مقام هدایت (باید د چارو د لا ښه سمون لپاره د ابتدائیه محاکمو څخه وخت پر وخت لیدنه ترسره شي ) ورسره شریک کړ.
ورپسې د ښاري محکمې رئیس د دې محکمې ضروریات له یاد پلاوي سره شریک کړل او په دې برخه کې د مرافعه محکمې د همکارۍ ډاډ ورکړل شو.
دغه راز یاد پلاوي د ښاري محکمې له دېوانونو لیدنه وکړه، د دېوانونو اداري او قضائي چارې یې وارزولې، د يادو دېوانونو د کارکوونکو کارونه یې وستایل، ستونزې یې واورېدې او د همکارۍ ډاډ یې ورکړ.
د ليدنې په پای کې ياد پلاوي د کارونو د لا ښه سمون او خپل مسؤولیت ته د متوجه کېدلو په اړه ورته لازمې سپارښتنې وکړې؛ د دېوانونو رئیسانو د یاد پلاوي څخه مننه وکړه او خپله خوښي یې څرګنده کړه.
