د قضائیه قوې د محاکمو امنیتي او اجرائیوي چارو عمومي ریاست د مجاهدینو د ظرفیتونو د لوړولو لپاره تعلیمي او تربیتي مرکز جوړ او فعالیت یې پیل کړ
د روان ۱۴۴۵ هـ ق کال د رجب المرجب میاشتې په ۷مه نېټه د قضائیه قوې د محاکمو امنیتي او اجرائیوي چارو عمومي ریاست کې د مجاهدینو د ظرفیتونو د لوړولو لپاره تعلیمي او تربیتي مرکز په ښه او معیاري شکل جوړ او د دغه ریاست اړوند مسؤولینو په حضور کې يې پرانیست غونډه ترسره شوه.
په یاد تعلیمي او تربیتي مرکز کې اوس مهال لومړۍ دوره (۱۲۰) تنه مجاهدینو ته د یو شمېر خاصو نظامي او مسلکي زده کړو ترڅنګ امنیتي، د توقیف خونې امنیت تأمینولو، د تالاشۍ اصول، د مراجعینو سره نېک چلند او اسلامي عقیدوي روزنه هم ورکول کېږي او د زده کړو دغه بهیر به هره دوره په دوو میاشتو کې د یاد ریاست اړوند مجاهدینو ته ترسره کېږي.
د یاد تعلیمي او تربیتي مرکز د پرانیستلو په اړه د قضائیه قوې د محاکمو امنیتي او اجرائیوي چارو عمومي رئیس محترم الحاج مولوي محمد عوض (سعید) وویل، دغه تعلیمي او تربیتي مرکز زموږ لپاره یوه لویه لاسته راوړنه ده او زیاته یې کړه چې په دغه روزنیز مرکز کې به په دوامداره توګه د دې ریاست مجاهدینو ته نظامي، فکري او عقیدوي زده کړې ورکول کېږي.
