د سترې محکمې د جزا دېوان عمومي رئيس د ميدان وردګ او غزني ولایتونو د قضائي، نظامي او ملکي ادارو له مسؤولينو سره وکتل

د سترې محکمې د جزا دېوان عمومي رئيس محترم مفتي عتیق الله (دروېش) ميدان وردګ او غزني ته د سفر پر مهال د يادو ولايتونو د ټولو قضائي، نظامي او ملکي ادارو له مسؤولينو سره وکتل.
په دې ليدنو کې چې عمده موخه یې د ولایتي ادارو ترمنځ د همغږۍ لا تقویه وه، د سترې محکمې د جزا دېوان عمومي رئيس وویل، یوازینی نظام چې د انسانانو او ان ټولو ژوندیو موجوداتو حقوق په کې خوندي دي، اسلامي نظام دی او د دې نظام د پایښت او ساتنې لپاره کار کول زموږ ټولو مسؤولیت دی.
په دغه لیدنه کې ښاغلي مفتي دروېش د قضائي،  ملکي او نظامي ادارو ترمنځ پر همغږۍ، د امنیت په تأمین، د فساد پر وړاندې پر مبارزه، د جرایمو په مخنیوي، د حکومت او ولسونو ترمنځ په باور رامنځته کولو ټینګار وکړ او له مسؤولینو یې وغوښتل چې د خپلو دندو د لایحو مطابق مسؤولیتونه ترسره کړي.
نوموړي زیاته کړه، محاکم د شرعي اصولو او شرایطو په پام کې نیولو سره د هېواد په ټولو ولایتونو او لرې پرتو سیمو کې پر مجرمینو شرعي حدود پلي کوي او تعزيري سزاوې ورکوي؛ چې په دې سره به د جرایمو په مخنیوي او کموالي کې د پام وړ بدلون راشي، همدارنګه نوموړي د محاکمو او جرمونو پر وړاندې د مبارزې مسؤولینو ته په بېلابېلو برخو کې اړینې سپارښتنې وکړې.
د ليدنو په وروستيو کې د يادو ولایتونو مسؤولینو راغلي پلاوي ته په پورته یادو شویو برخو کې د همکارۍ ډاډ ورکړ وویل، دلته د محاکمو، ملکي او نظامي ادارو ترمنځ بشپړه همغږي موجوده ده، د شرعي نظام او د اسلامي امارت د مشرتابه ټول فرمانونه په ښه ډول پلي کېږي.