د میدان وردګو ولايت د چک ولسوالۍ ابتدائيه محکمې له لوري درې تنه مجرمينو باندي تعزیري سزا تطبيق ترسره شو

د روان ۱۴۴۴ هجري قمري کال د ذوالحجې میاشتې په ۱۷ نېټه د میدان وردګ ولایت په مرکز میدان ښار د غازي امان الله خان په ورزشي لوبغالي کې د چک ولسوالۍ ابتدائیه محکمې له لوري په دري تنو مجرمینو تعزيري سزا تطبيق شوه.
يادو مجرمينو ته چې دوه يې نارينه او يوه ښځينه وه، چې له کور څخه د تيښتې په تور د درې ګونو محاکمو له طی کولو وروسته  په عام محضر کې تعزیري سزا ورکړل شوه.
د تعزیري سزا د تطبيق په دې مراسمو کې د دولتي مسؤلينو سربېره عامو هيوادوالو هم ګډون کړی وو.
په مراسمو کې د قوماندانۍ قومندان ښاغلي شیخ محمد شریف حلیمي صاحب د حدودو او تعزیري جزاګانو د تطبیق په اهمیت هر اړخیزې خبرې وکړې او د محاکمو له قضاتو یې مننه وکړه، چې د شهیدانو آرمانونه یې پوره کړل چې یو یې هم د حدودو او تعزیراتو تنفیذ وو.
د شرعي قوانینو تنفیذ یې د خپلې سپيڅلې مبارزې ستره موخه او آرمان یاد کړ او دا یې لویه لاسته راوړنه وبلله.
 ورپسې د یاد ولایت د مرافعه محکمې عمومي رئيس ښاغلي مولوي عبدالکریم حقاني صاحب د حدودو او تعزیراتو په اهمیت خبرې وکړې او وویل، چې د اسلامي امارت په محاکمو کې به هر مجرم مجازات کیږي، د حدود او تعزیراتو نافذول یې د دنیا او آخرت د خیر ذریعه یاده کړه او د نورو د عبرت وسیله یې وبلله.
همدا راز عامو خلکو د محاکمو په داسې کړنو خوښي څرګنده کړه او د الله تعالی شکر یې ادا کړ.
 غونډه دعائیه په ویلو سره پای ته ورسېده.