ميدان وردګ ولايت کې دوو متهمينو ته تعزيري سزا ورکړل شوه
د ميدان وردګ ولايت د چک ولسوالۍ د ابتدائيه محکمې د پرېکړې په اساس دوو تنو ته چې پر لواطت متهم وو؛ په ۲/ ۳/ ۱۴۴۶هـ ق نېټه په عام محضر کې تعزيري سزا ورکړل شوه.
د چک ولسوالۍ ابتدائيه محکمې ياد متهمين پر دوه کاله تنفيذي بند او ۳۹ـ ۳۹ دُرو تعزيري سزا محکوم کړي وو.
په دې موخه جوړه شوې غونډه د قرآنکریم د څو مبارکو آیاتونو په تلاوت پیل شوه؛ ورپسې د چک ولسوالۍ د ابتدائیه محکمې رئیس مولوي عبدالصمد (فياض) د یادو متهمينو فیصله ابلاغ کړه.
د غونډې په دوام د مرافعه محکمې عمومي رئیس محترم مولوي عبدالله (فرقاني) اسلامي شریعت کې د تعزیر په اړه خبرې وکړې او د یادې موضوع اړوند يې هر اړخيز معلومات وړاندې کړل.
غونډه د دعا په ویلو پای ته ورسېده.
