د کابل ولایت قره باغ ولسوالۍ ابتدائیه محکمې د مسؤولینو په هڅو د قتل موضوع حل او فصل شوه
د کابل ولایت مرافعه محکمې اړوند قره باغ ولسوالۍ ابتدائیه محکمې سرپرست رئیس محترم مفتي محمد هاشم (الهام) په ډېرو هڅو او ترغیب، د قومي مشرانو په منځګړیتوت په ۱۴ /۱۱ /۱۴۴۶هـ ق نېټه د ترافیکې پېښې له امله رامنځته شوې د قتل موضوع حل او فصل شوه.
د قتل یاده موضوع د قره باغ ولسوالۍ اړوند د سبزسنګ مکتب ترڅنګ رامنځته شوې وه؛ چې محکمې ته تر راجع کېدو وروسته په غور او دقت وڅېړل شوه.
ورپسې د ابتدائیه محکمې مسؤولينو د قضیې دواړه لوري سولې ته وهڅول، له ډېرو هڅو وروسته د مقتول وارثينو سولې ته غاړه کېښوده.
یاده موضوع د يوې غونډې په ترڅ کې چې قومي مشرانو، سپينږيرو، موټروان او د مقتول وارثينو په کې ګډون درلود؛ د مقتول وارثينو قاتل ته بخښنه وکړه او یاده موضوع په رسمي ډول پای ته ورسېده.
