د لغمان ولایت مرافعه محکمې رئیس د عدليې وزارت له پلاوي سره وکتل
د لغمان ولايت مرافعه محکمې رئيس الحاج شیخ سخي الرحمن (فایز فیروزکوهي)؛ د عدلیې وزارت له راغلي پلاوي چې مشري یې د حقوقي مساعدینو رئیس مفتي ضیاء الحق (ثاقب) کوله، په ۲۰/ ۸/ ۱۴۴۷ هـ ق نېټه لیدنه وکړه.
په دې ليدنه کې د مرافعه محکمې دېوانونو رئیسانو، ښاري ابتدائیه محکمې رئیس، د عدلیې ریاست رئیس او د زندان آمر ګډون درلود.
د ليدنې په پيل کې د مرافعه محکمې رئیس راغلو مېلمنو ته ښه راغلاست ووایه؛ ورپسې راغلي پلاوي د عدلیې وزارت د محترم وزیر پیغام ګډونوالو ته وړاندې کړ او د اړوند ادارو د همغږۍ په اړه يې خبرې وکړې، د حقوقي مساعدینو د مسؤولیت په اړه وویل، دا زموږ دنده ده ترڅو هغه کسان چې بې بضاعته وي، سرپرست ونلري او د خپلو حقوقو څخه د محاکمو په وړاندې دفاع نشي کولای، د هغوی له حقوقو څخه دفاع وکړو او د خپل وس مطابق ورسره قانوني مرسته وکړو.
دغه راز زموږ مسؤولیت دا نه ده چې د مجرم سپیناوی وکړو، بلکې هڅه به کوو ترڅو خلک د جرم په نشتون کې له تعزیر څخه وژغورو او یا هم له ټاکلي تعزیر څخه زیاته سزا ور نکړل شي.
د ليدنې په پای کې یاد پلاوي د مساعدینو سره د محاکمو د همکارۍ غوښتنه وکړه او د مرافعه محکمې رئيس او اړوندو ادارو لخوا ډاډ ورکړل شو.
