د خوست د مرافعه محکمې عمومي رئيس د ياد ولايت د صبريو، ځاځي ميدان او باک ولسواليو له ابتدائيه محاکمو ليدنه وکړه
د ۱۴۴۵هـ ق کال د جمادی الأولی مياشتې په لومړۍ، ۸مه او ۶مه نېټه د خوست د مرافعه محکمې د عمومي رئیس محترم الحاج مولوي امین الله (منیب) په مشرۍ یوه پلاوي د دغه ولایت د صبریو، ځاځي ميدان او باک ولسواليو له ابتدائیه محاکمو څخه لیدنه وکړه.
په ياد پلاوي کې د مرافعه محکمې د عامه امنيت دېوان سرپرست رئيس مولوي بادشاه (جلالي)، د مدني دېوان قضائي غړي مولوي حکیم الله (وقار) او د تحریراتو آمر امین الله (حنفي) ګډون درلود.
د دغه پلاوي له لوري د صبریو، ځاځي ميدان او باک ولسواليو د ابتدائیه محاکمو قضائي او اداري چارې وارزول شوې او د اجراآتو د پیاوړتیا په موخه د ابتدائیه محاکمو مسؤولینو ته لازمې سپارښتنې وشوې.
د یادې لیدنې په پای کې د صبريو، ځاځي ميدان او باک ولسواليو د ابتدائيه محاکمو د غړو ستونزې واورېدل شوې او د ستونزو د حل په برخه کې د همکارۍ ډاډ ورکړل شو.
