د سترې محکمې د جزا دېوان عمومي رئیس د یوه پلاوي په مشرۍ لغمان، کونړ او ننګرهار ولایتونو ته سفر وکړ
د روان ۱۴۴۵ هـ ق کال د ربیع الثاني میاشتې په ۳۰مه نېټه د سترې محکمې د مرکزي تمیز اړوند جزا دېوان عمومي رئیس محترم مفتي عتیق الله (دروېش) د یوه پلاوي په مشرۍ د یو شمېر جزائي موضوعاتو د حل او فصل په موخه لغمان، کونړ او ننګرهار ولایتونو ته سفر وکړ.
د جزا دېوان عمومي رئیس او ورسره مل پلاوي د یاد سفر په جریان کې د دغه درېیو ولایتونو د مرافعه محاکمو له رئیسانو، قضائي غړو او یو شمېر نورو مسؤولینو سره هم وکتل.
محترم مفتي دروېش صاحب د یادې لیدنې پر مهال د دغه ولایتونو د محاکمو قضائي غړو ته د جزائي دوسیو د حل او فصل په برخه کې لازم هدایات وکړل.
دغه راز د سترې محکمې د جزا دېوان عمومي رئیس د یادو ولایتونو له زندانونو څخه هم لیدنه وکړه او د جزائي موضوعاتو اړوند بندیانو څخه یې د دوی د وضعیت او دوسیو په اړه پوره تحقیق وکړ.
د یادونې وړ ده چې د سترې محکمې دغه پلاوی له خپل کاري سفر وروسته د یکشنبې په ورځ بېرته سترې محکمې ته راستون شو.
