د لغمان د مرافعه محکمې رئیس د مرافعه او ښاري ابتدائیه محاکمو له دېوانونو څخه ليدنه وکړه

د لغمان ولایت د مرافعه محکمې عمومي رئیس الحاج مولوي عبدالکریم (حقاني)، د تحريراتو د آمر شفيع الله (عابد) په ملتيا د روان ۱۴۴۶ هـ ق کال د محرم الحرام میاشتې په ۱۴مه او ۱۵مه نېټه د لغمان ولایت د مرافعه او ښاري ابتدائیه محاکمو له دېوانونو او د وثایقو له آمریت څخه لیدنه وکړه.
په دې لیدنه کې د مرافعه محکمې رئيس د دېوانونو قضائي، اداري او د وثایقو په برخه کې اجراآت له نږدې وکتل، د قضائي اجراآتو د لا بهبود په موخه یې د یادو محاکمو مسؤولینو ته لازمې لارښوونې وکړې.
د ليدنې په دوام د مرافعه محکمې رئيس د یادو دېوانونو پر غوره او اصولي اجراآتو خوښي څرګنده کړه او په چارو کې یې د چټکتیا او دقت کولو په اړه ورته لازم هدایات وکړل.
ورپسې د  تحریراتو آمر په خپله برخه کې د يادو دېوانونو اجراآت وکتل.
دغه راز د مرافعه محکمې رئیس اړونده مسؤولینو ته په خطاب کې وویل، د قضائي او اداري اجراآتو پر مهال باید د شرعي قانون، اصولو او هغه تعلیماتنامې چې د عالي مقام له خوا تصویب شوې، په پوره توګه مراعات وکړئ، ترڅو مو کړنې اصلاح او د نیمګړتیاوو څخه خالي وي.