د پکتیکا ولایت د مرافعه محکمې د نوي رئیس د معرفت غونډه ترسره شوه
د روان ۱۴۴۵ هـ ق کال د ربیع الاول میاشتې په لومړۍ نېټه د پکتیکاولایت د مرافعه محکمې لپاره نوی رئیس محترم مفتي محبوب الرحمن «نقشبندي» د یوې غونډې په ترڅ کې د یاد ولایت قضائي او اداري کارکوونکو ته ور وپېژندل شو.
یاده غونډه چې د پکتیکاولایت د مرافعه محکمې په تالارکې جوړه شوې وه او د مرافعه، ښاري ابتدائیه محاکمو د قضائي او اداري مسؤولینو اوکارکوونکو، د مرافعه محکمې پخواني رئیس محترم مفتي عبیدالله« خالد» او د دې محکمې اوسني رئیس محترم مفتي محبوب الرحمن«نقشبندي» په کې ګډون درلود د قرآنکریم د مبارکو آیاتونو په تلاوت پیل شوه.
ورپسې د پکتیکا ولایت د مرافعه محکمې پخواني رئیس محترم مفتي عبیدالله«خالد» د قضاء د اهمیت او استقلالیت په اړه هراړخیزه وینا وکړه او د نوي رئیس د شخصیت ستاینه یې وکړه.
دغه راز د یاد ولایت د مرافعه محکمې د مدني او عامه حقونو دېوان رئیس محترم الحاج مولوي عبیدالله «فیاض» د تېر شل کلن جهادي دور او انقلاب د زحمتونو په اړه خبرې وکړې او نوي معرفي شوي رئیس ته یې د قاضي صاحبانو او کارمندانو د اطاعت او په کارونو کې د اخلاص او صداقت په اړه اطمینان ورکړ.
نوموړي له پخواني رئیس الحاج مفتي عبیدالله«خالد» څخه مننه وکړه او نوي رئیس ته یې هرکلی ووایه.
ورپسې د مرافعه محکمې لپاره نوي معرفي شوي رئیس محترم مفتي محبوب الرحمن«نقشبندي» په خپلو خبرو کې د قضاء د اهمیت، منصب او د ریاست د خدمت په اړه تفصیلي وینا وکړه وویل چې عدالت راوستل او عدالت پلي کول مو اساسي وظیفه ده.
نوموړي زیاته کړ ه، لوی جهاد د خپل نفس سره دی او د اسلامي امارت هر خادم او کارمند باید په خپل نفس باندې پوره تسلط ولري.
محترم مفتي محبوب الرحمن«نقشبندي» وویل، د مراجعینو کارونو ته باید په وخت سره رسېدنه وشي او په کارونوکې یې بدون له کوم شرعي عذر څخه ځنډ واقع نشي.
یاده معرفت غونډه د مرافعه محکمې د جزاء دېوان د رئیس محترم محمد«مختاري» لخوا په اختطامیه دعاسره پای ته ورسېده.
