د ننګرهار د مرافعه محکمې د رئيس په مشرۍ د همغږۍ غونډه وشوه
د دوشنبې په ورځ (۳/ ۷/ ۱۴۴۵هـ ق) نېټه د ننګرهار د مرافعه محکمې رئیس محترم مولوي عبدالشکور (رشاد اخندزاده) د ښاري ابتدائيه محکمې له رئیس، د ننګرهار ولایت د استخباراتو ریاست او د امنیه قوماندانۍ له استازو سره د همغږۍ غونډه وکړه.
د ننګرهار د مرافعه محکمې رئیس محترم مولوي عبدالشکور (رشاد اخندزاده) د غونډې ګډونوالو ته ښه راغلاست ووايه، ورپسې يې د مظنونینو دوسیو ته پر وخت د رسېدنې او پر یو شمېر نورو موضوعاتو بحث او خبرې وکړې.
د محترم اخندزاده له لوري د اجراآتو د چټکتيا او ښه والي په موخه ورته لازمې سپارښتنې وشوې، ترڅو د مظنونینو ستونزو ته پر خپل وخت رسېدنه وکړي او دوسیې يې ژر بررسي کړي.
د غونډې په دوام د ننګرهار د استخباراتو ریاست او د امنیه قوماندانۍ استازو د اړونده ادارو ځینې مربوطه موضوعات د مرافعه محکمې له رئیس سره شریک کړل.
د ننګرهار د مرافعه محکمې رئیس د غونډې ګډونوالو ته په ټاکلي وخت د موضوعاتو ته د حل او له مراجعینو سره د ښه سلوک او چلند توصیه وکړه.
