د کاپيسا ولايت مرافعه محکمې رئيس د یاد ولايت د درېيو ولسواليو له ابتدائیه محاکمو څخه ليدنه وکړه
د کاپیسا ولایت مرافعه محکمې عمومي رئیس الحاج مولوي عزیزالرحمن (حقاني)، د مرافعه محکمې جزا دېوان رئیس مولوي سراج الدین (راشد) او د حقوقو آمر مولوي محمد فرویز (انس) په ملتیا، د ۱۴۴۸هـ ق کال د جمادی الأولی په ۵ مه نېټه د دغه ولایت د الهساي، تګاب او نجراب ولسواليو له ابتدائیه محاکمو څخه لیدنه وکړه.
د مرافعه محکمې هیئت د دغو ولسوالیو له ابتدائیه محاکمو او حقوقو مدیریتونو څخه د لیدنې پر مهال د محاکمو قضائي او اداري چارې وکتلې، د قضائي او اداري چارو د لا ښهوالي او د خلکو ستونزو ته پر وخت د رسېدنې په موخه یې اړوند مسئولینو ته لازمې سپارښتنې وکړې.
دغه راز د ابتدائیه محاکمو ځینې صادرې شوې فیصلې او قرارونه هم وکتل شول او قاضي صاحبانو ته د کار په شفافیت، د اصولو پر رعایت او دقت باندې ټینګار وشو، تر څو خلک له بېځایه سرګردانۍ څخه خلاص شي.
د مرافعه محکمې رئيس د یادو محاکمو مسئولینو ته سپارښتنه وکړه، چې د مراجعینو ستونزو ته د اصولو په رڼا کې رسېدنه وکړي، خپلو دندو ته ټاکلي وخت حاضر شي او له ټولو امارتي ادارو سره سالمه همغږي ولري.
نوموړي په خپلو خبرو کې وویل، اسلامي امارت د بې شمېره شهيدانو د مقدسو وینو محصول او د الله (جلجلاله) ستر نعمت او لوی امانت دی، پر موږ او تاسو لازمه ده، چې باید حق یې ادا کړو، د دغه نظام بنسټ او بنیاد عدل او انصاف دی، نو باید موږ او تاسو د خپلو شرعي پرېکړو په اساس عدالت تأمین کړو.
په پای کې د مرافعه محکمې رئيس ټولو قضائي غړو او کارکوونکو ته د همکارۍ او د دوی ستونزو ته د رسېدنې ډاډ ورکړ.
