پکتیکا ولایت کې درېیو مجرمینو ته تعزیري سزا ورکړل شوه
پکتیکا ولایت کې په ۱۴۴۴/۵/۳ هـ ق نېټه د شرعي ښاري ابتدائیه محکمې د جزاء دېوان په حکم د دغه ولایت مرکز ښرنې په ورزشي سټېډیوم درېیو مجرمینو ته د غلا په جرم تعزیري سزا ورکړل شوه.
مجرمنیو ته د تعزیري سزا د تطبیق په مناسبت جوړو شوو دغه مراسمو کې د پکتیکا والي محترم عبدالله«مختار»، د پکتیکا د استیناف محکمې رئیس محترم مولوي امان الله«منقاد حقاني»، د ښاري محکمې رئیس محترم مولوي محمد اشرف «ابوخالد»، د جزاء دېوان رئیس محترم مولوي فال محمد«حاذق»، د استیناف او ښاري محاکمو قضاتو او عامو خلکو ګډون درلود.
د پکتیکا د استیناف محکمې رئیس محترم مفتي امان الله«منقاد حقاني» یادې ناستې ته د قضاء د اهمیت په هکله وویل، د اسلامي نظام لپاره قضاء د روح حیثیت لري.
دغه راز محترم مفتي منقاد حقاني د قضاء د یو شمېر حکمتونو او مسؤولیتونه (اظهارالعدل، دفع الظلم، انصاف المظلوم من الظالم، ایصال الحق الی المستحق و امربالمعروف و نهي عن المنکر) په اړه تفصیلې خبرې وکړې.
دغه راز د پکتیکا والي حاضرینو ته د اسلامي نظام د اهمیت او ارزښت په اړه وینا وکړه وویل، افغانستان کې حاکم اسلامي نظام د میلیونونو شهیدانو د قربانیو په برکت واک ته رسېدلی دی، او دا د شکر ځای دی چې نن شرعي محاکم د شریعت مطابق فیصلې کوي.
د پکتیکا والي په خپلو خبرو کې له محاکمو سره د ولایتي ادارو د بشپړې همکارۍ ډاډ ورکړ وویل، موږ به د محاکمو ملاتړ او همکاري کوو، ترڅو مو نظام شفاف او قوي شي.
