د پکتیکاولایت د استیناف محکمې د نوي رئیس دمعرفت غونډه ترسره شوه
د روان ۱۴۴۴ هجري قمري کال د رمضان میاشتې په ۱۲مه نېټه د پکتیکا ولایت د استیناف محکمې لپاره نوی رئیس مفتي عبیدالله «خالد» دیوې غونډې په ترڅ کې د یاد ولایت قضائي او اداري کارکوونکو ته ور وپېژندل شو.
په یاده معرفت غونډه کې چې د پکتیکاولایت د استیناف محکمې په تالارکې جوړه شوې وه، د پکتیکا محترم والي الحاج مولوي عبدالله «مختار»، دیني عالمانو، قومي مشرانو، د استیناف او ښاري محکمې قضائي او اداري کارکوونکو، د استیناف محکمې پخواني رئیس محترم مفتي امان الله «منقاد حقاني»، د پکتیکا د مرافعه محکمې لپاره نوي معرفي شوي رئیس او ورسره مل پلاوي چې له پکتیا ولایت څخه یې د مفتي عبیدالله «خالد» ملتیا کوله ګډون درلود.
غونډه د پکتیا د استیناف محکمې د ثبت اسناد وثایقو او مخزن آمریت د عضو محرر لخوا د قرآنکریم د مبارکو آیاتونو په تلاوت پیل شوه؛ ورپسې د پکتیکا ولایت محترم والي الحاج مولوي عبدالله«مختار» د نظام د اهمیت په اړه تفصیلي وینا وکړه.
په دې سربېره، له پکتیا زون څخه راغلي د نظامي محکمې رئیس لنډه او عالمانه وینا وکړه، د پکتیا او پکتیکا ولایت د مرافعه محاکمو لپاره د نویو معرفي شوو رئیس صاحبانو لپاره یې په کارونو کې د بریالیتوب دعا وکړه او د سترې محکمې له یادو ټاکنو یې خوښي څرګنده کړه.
د غونډې په دوام د پکتیکا د مرافعه محکمې مخکني رئیس محترم مفتي امان الله«منقاد حقاني» د یاد ولایت د محاکمو لپاره نوی معرفي شوی رئیس مفتي عبیدالله «خالد» دغونډې ګډونوالو ته ورمعرفي کړ، د یاد ولایت د قضائي او اداري کارکوونکو په اړه یې نوي رئیس ته ډاډ ورکړ.
یاده معرفت غونډه د پکتیکا د علماوو شورا د استازي لخوا د دعا په ویلو پای ته ورسېده.
