د سترې محکمې د اداري مرستیال په مشرۍ د کارونو د لا ښه تنظیم او چټکتیا په موخه اداري ناسته ترسره شوه

نن دوشنبه د روان ۱۴۴۵ هـ ق کال د ربیع الثاني میاشتې په ۸مه نېټه د سترې محکمې د اداري مرستیال محترم شیخ عبدالمالک (حقاني) صاحب په مشرۍ د سترې محکمې د اداري چارو د لا ښه تنظیم چټکتیا په موخه اداري ناسته ترسره شوه.
په دې ناسته کې چې د سترې محکمې د اداري معاونیت په دفتر کې ترسره شوه  د سترې محکمې د مقام د دفتر عمومي رئیس محترم مولوي عبدالوکیل (حقاني)، د سترې محکمې د مالي او اداري چارو عمومي رئیس محترم حاجي مولوي کریم الله (زاهد)، د اداري معاونیت د دفتر رئیس محترم مولوي عبدالمتین (صمیم)، د استخدام او سوانحو رئیس محترم مولوي نقیب الله (انقیادي)، د مالي او حسابي چارو رئیس محترم ملا محمود، د اداري چارو رئیس محترم سید مجیب الله (ځل) او د بهرنیو، عامه اړیکو او مطبوعاتو رئیس محترم مولوي عبدالرحیم (راشد) ګډون درلود.
د سترې محکمې اداري معاون محترم شیخ عبدالمالک (حقاني) صاحب د ناستې ګډونوالو ته هدایت وکړ چې خپلې رسمي چارې په بشپړ اخلاص او امانتدارۍ ترسره کړي، حاضرۍ ته پابندي وکړي، په کارونو کې دې سلسله مراتب په پام کې ولري او د رسمي کارونو پر مهال دې شخصي غوښتنې او کارونه له نظره وغورځوي.
محترم حقاني صاحب د ناستې له ګډونوالو وغوښتل چې ټول کارونه په نوبت او د سترې محکمې د کاري طرزالعمل مطابق په اصولي ډول ترسره کړي او ماتحت مسؤولینو ته دې د کارونو د اجرا قطعي هدایت کوي.
د سترې محکمې د اداري معاون محترم شیخ عبدالمالک (حقاني) صاحب تر وینا وروسته په دې اداري ناسته کې د حاضرینو لخوا په یو شمېر اړینو مواردو تفصیلي خبرې وشوې او د سترې محکمې اداري معاون محترم شیخ عبدالمالک (حقاني) په غونډه کې د ذکر شوو مواردو اړوند لازم هدایات شریک کړل.