د امنیتي او اجرائیوي چارو عمومي ریاست یوه پلاوي د حقوقو عمومي ریاست او د کابل د یو شمېر محاکمو د امنیتي قطعاتو له چارو څارنه وکړه
د روان ١٤٤٥ هـ ق کال د ربیع الثاني میاشتې له پنځمې نېټې څخه تر ۱۰مې نېټې پورې د سترې محکمې د محاکمو د امنیتي او اجرائیوي چارو عمومي ریاست اړوند د تفتیش او کنټرول مدیریت پنځه کسیز پلاوي چې د تفتیش عمومي مدیر، د دعوت او ارشاد مدیر، د پلان او اوپراسیون مدیریت مرستیال او د مطبوعاتو آمر یې غړیتوب درلود، د حقوقو عمومي ریاست تر څنګ د کابل ولایت د ملکي او نظامي محاکمو د امنیتي قطعاتو له چارو لیدنه او څارنه وکړه.
د یاد ریاست د تفتیش او کنټرول مدیریت پلاوي په دې لیدنه کې د قضائیه قوې د ملکي محاکمو د امنیتي قطعاتو عمومي معاونیت تر څنګ د یو لړ ملکي محاکمو د امنیتي قطعاتو د مجاهدینو د تعیناتو، اداري او امنیتې چارو، د تامیناتي چارو اکمال او توزیع، د پرسونل له حاضرۍ او مالي چارو، د مراجعینو او وسایطو د تلاشۍ له بهیر او نورو اړوند مواردو څخه کنټرول او څارنه وکړه.
دغه راز یاد پلاوي مجاهدینو ته د سیرت او صورت د اصلاح، پر نبوي سنتو د ځان برابرولو، په جماعت سره د لمانځه ادا کولو او خپلو دندو ته د پاملرنې برخه کې د لازمو لارښوونو او سپارښتنو ترڅنګ مجاهدین د امنیتي چارو لا ښه سمبال، له مراجعینو سره نېک چلند او نبوي اخلاقو لرلو ته وهڅول.
د یادونې وړ ده چې د قضائي قوې د امنیتي او اجرائیوي چارو عمومي ریاست دغه پلاوي د محاکمو له رئیسانو سره هم د اړوند مواردو په تړاو د مشورو لپاره ناستې ترسره کړې.
