د سترې محکمې د جزا دېوان رئیس لوګر ولایت ته سفر وکړ
د سترې محکمې د رئیس او قاضي القضات محترم شیخ عبدالحکیم (حقاني) صاحب په ځانګړي هدایت د سترې محکمې د جزا دېوان عمومي رئیس محترم مفتي عتیق الله (دروېش) ولایاتو ته د سفر په دوام د روان ۱۴۴۵ هـ ق کال د جمادی الثانیه میاشتې په ۲۴مه نېټه لوګر ولایت ته سفر وکړ.
د دغه سفر عمده موخه د لوګر د والي صاحب په ګډون له ټولو ولایتي مسؤولینو سره د همغږۍ د ناستې جوړول او د ولایتي ادارو ترمنځ د همغږۍ د تقویې پر لارو چارو خبرې وې.
د سترې محکمې د جزا دېوان رئیس یاد ولایت ته د سفر پر مهال د والي صاحب په ګډون له ټولو ولایتي اداري مسؤولینو سره ناسته وکړه، غونډه د قرآنکریم د مبارکو آیاتونو په تلاوت پیل شوه، ورپسې محترم مفتي عتیق الله (دروېش) صاحب د غونډې ګډونوالو ته د عدالت د تأمین، ډاډمن امنیت، له مظلوم سره همکاري او د هغه فریاد اورېدلو، د فساد مخنیوي او د ولایتي ادارو ترمنځ د همکارۍ او همغږۍ پر لارو چارو خبرې وکړې.
د جزا دېوان عمومي رئیس د غونډې ګډونوالو ته د اسلامي نظام تر چتر لاندې ادارو ترمنځ د همغږۍ د موجودیت پر اړتیا او ګټو تفصیلي خبرې وکړې وویل، د ټولو ادارو مسؤولین باید د اړتیا پر مهال له یو بل سره پوره همکاري وکړي، د دوی ترمنځ باید همغږي دومره قوي وي چې دښمن په هېڅ صورت په کې د جرم ترسره کولو فرصت پیدا نه کړي.
دغه راز نوموړي د افغانستان ځورېدلي ملت ته د خدمت ترسره کول د هر مسؤول مکلفیت وباله زیاته یې کړه، موږ باید خپل راسپارل شوي مسؤولیتونه په ښه ډول ترسره کړو، ولس ته نه ستړې کېدونکي خدمات ترسره کړو او د دوی د تېرو څه باندې ۴۰ کلونو پر ټپونو پټۍ ولګوو.
دغه راز د ناستې نورو ګډونوالو هم د همغږۍ او همکارۍ پر تقویه خبرې وکړې او خپل نظرونه او وړاندیزونه یې شریک کړل.
غونډې د دعا په ویلو پای ته ورسېده.
