د کابل ولايت د حقوقو رئيس د فرزې، استالف او قره باغ ولسواليو د حقوقو له مديریتونو څخه ليدنه وکړه

د کابل ولايت د حقوقو رئيس محترم مفتي نصیب الله (طیب)، په (۱۷/۴/۱۴۴۸هـ ق) نېټه د دغه ولايت د فرزې، استالف او قره‌باغ ولسواليو د حقوقو له مديريتونو څخه ليدنه وکړه.
د کابل د حقوقو رياست رئيس لومړی د هرې ولسوالۍ د حقوقو مديریت له کاري جريان څخه ليدنه وکړه؛ ورپسې اړوند مسئولینو ته ټینګار وکړ، چې له مراجعينو سره نېک چلند کوئ، حقونو ته یې پر وخت رسېدنه کوئ.
په دې سربېره محترم  مفتي نصیب الله (طیب) د یادو ولسوالیو د حقوقو مدیریتونو د مراجعینو ستونزې او موضوعات واورېدل؛ ډاډ یې ورکړ، چې موضوعاتو ته به یې د اصولو مطابق په ټاکلي وخت رسېدنه کېږي.
دغه راز د حقوقو ریاست رئيس د يادو ولسواليو له ولسوالانو او د محاکمو له رئيسانو سره هم د کارونو د ښه‌والي او ښې همکارۍ په پار جلا جلا ناستې وکړې او یادو مسئولینو له خپل اړخه د پوره همکارۍ ډاډ څرګند کړ.