د هلمند د مرافعه محکمې د رئیس په مشرۍ د یاد ولایت محاکمو د مسؤولینو اداري غونډه ترسره شوه
په 19 /10 /1444 هجري قمري نېټه د هلمند ولایت د مرافعه محکمې ریاست په مقام کې د یادې محکمې د رئیس محترم مولوي محمد نبي (حماس) په مشرۍ غونډه ترسره شوه.
په دې غونډه کې چې د قرآنکریم د مبارکو آیاتونو په تلاوت پيل شوه، د مرافعه محکمې د ټولو دېوانونو قاضیانو، مفتیانو او محررینو ګډون درلود.
د مرافعه محکمې رئیس محترم مولوي (حماس) د غونډې ګډنوالو ته ویناوکړه او قضاتو ته یې توصیه وکړه چې که هره دېوان کومه ستونزه یا موضوع درلوده، درې ورځې مخکې دې د اداري ناستې په اجنډا کې د شاملولو په موخه د ریاست مقام ته راوړي، ترڅو موږ ورته اصولي حللاره پیدا کړو.
نوموړي د محاکمو د ټولو مسؤولینو ترمنځ پر همغږۍ ټینګار وکړ او وویل، په اداري او قضائي ناستو کې به په ګډه د غونډې په اجنډا کې د شاملو موضوعاتو په اړه بحث او تحلیل کوو.
دغه راز محترم مولوي حماس زیاته کړه، په راتلونکې اونۍ کې به محبس ته ځو او د بې برخلیکه بندیانو دوسیې به ګورو، که کوم مسؤول کس په خپل سر بندیان کړي وو له هغه سره به حساب کوو او هغه بندي به له بند څخه آزادوو.
د مرافعه محکمې رئیس وویل، راتلونکو ورځو کې به د ولسوالیو د ابتدائیه محاکمو بررسي کوو او له ولسوالانو سره به مجلس کوو.
د محترم مولوي (حماس) په خبره، د یو شمېر دېوانونو لکه مدني دېوان چارې چې د نورو په پرتله ډېرې دي، باید نورو دېوانونو ته تحویل کړل شي.
