د اروزګان د مرافعه محکمې رئیس د چورې ولسوالۍ د ابتدائیه محکمې له قضائي او اداري کارکوونکو سره وکتل
په ۱۰/۱/۱۴۴۵ هـ ق نېټه د اروزګان ولایت د مرافعه محکمې د عمومي رئیس الحاج شیخ مولوي سخیداد(ابوالتقی) په مشرۍ د دغه ولایت د چورې ولسوالۍ په ابتدائیه محکمه کې غونډه ترسره شوه.
یاده غونډه چې د چورې ابتدائیه محکمې رئیس مولوي بلوڅ صاحب، د یادې محکمې مفتي مولوي فیض الله صاحب او محرر مولوي اسد الله صاحب، ولسوال ملا سیدرسول (مسافر) صاحب، د قومندانۍ معاون حاجی خان صاحب، د استخباراتو معاون عبدالرحمن (منیر) صاحب، د مرافعه محکمې اجرائیه مدیر محب الله (نظري) صاحب، د ثبت اسناد او وثایقو مامور مولوي محمد(رهنما) صاحب او د حقوقو مدیر مولوي عبدالودود صاحب په کې ګډون درلود د مولوي محمد(رهنما) صاحب لخوا د قرآنکریم د څو مبارکو آیاتونو په تلاوت پیل شوه.
وروسته محترم شیخ مولوي سخیداد (ابوالتقی) د چورې ابتدائیه محکمې رئیس، مفتي، محرر او نور مسؤولینو ته ښه راغلاست ووایه او مننه یې ځینې وکړه چې د خپل وطن او ولس د خدمت برخه کې يې نه ستړې کیدونکې هلې ځلې کړې دي.
د اروزګان ولایت د مرافعه محکمې رئیس زیات کړه افغان ولس په تېره ۲۰ کلنه مبارزه کې له اسلامي امارت سره اوږه په اوږه ولاړ و او زموږ ستاسې خدمت یې کاوه؛ نو موږ مکلف یو چې نن یې خدمت وکړو او ولس خوشحاله وساتو چې په دې سره به خدای (جل جلاله) او رسول الله (صل الله علیه و سلم) هم له موږ راضي وي .
شیخ مولوي سخیداد (ابوالتقی) ټولو مسؤولینو ته سپارښتنه وکړه چې په خپل منځ کې اتحاد او اتفاق ولري، کوم مشکل چې مو منځ کې راغلی په اتفاق سره کښېنئ او هغه مشکل ته په همکارۍ د حل لاره پیدا کړئ، یو د بل په کار کې مداخله مه کوئ، هر مسؤول باید خپل مسؤولیت وپېژني او خاص د الله (جل جلاله) د رضا لپاره خدمت وکړي، په کوم کار کې چې د الله (جل جلاله) رضا، مینه او اخلاص وي نو ان شاءالله هېڅ وخت به ناکام را نه شي.
د ارزګان ولایت د چورې محکمې رئیس او ټولو مسؤولینو د مرافعه محکمې د عمومي رئیس څخه مننه وکړه چې وخت پر وخت له یادې ولسوالۍ څخه لیدنه کوي وویل، ان شاءالله ستاسې ټولې سپارښتنې به عملي کوو.
د غونډې په پای کې د مرافعه محکمې رئیس حاضرۍ ته په پابندۍ، له مراجعینو سره په ښه چلند، په اجراآتوکې پر شفافیت او د فساد د مخنیوي په هکله جدي سپارښتنې وکړې او یاده غونډه د حقوقو د مدیر مولوي عبدالودود صاحب په دعا سره پای ته ورسېده.
