د ننګرهار د مرافعه محکمې رئيس د دغه ولایت د لسو (۱۰) ولسواليو ابتدائيه محاکمو له مسؤولينو سره وکتل
د روان ۱۴۴۵هـ ق کال د ذوالقعدې میاشتې په ۳/ ۵/ مه نېټه د ننګرهار د مرافعه محکمې عمومي رئیس محترم مولوي عبدالشکور (رشاد اخندزاده) او ورسره مل پلاوي شیخ ولي محمد (حقاني) او قوماندان ابراهیم د چپرهار، پچیراګام، بهسود، کوټ، روادات، ده بالا، سرخرود، خوګیاڼيو، شېرزاد او حصارک ولسواليو د ابتدائیه محاکمو له مسؤولينو او کارکوونکو سره د چپرهار او خوګياڼي ولسواليو د ابتدائيه محاکمو په انګړ کې وکتل.
غونډه چې د يادو محاکمو ټولو کارکوونکو په کې شتون درلود، د شيخ ولي محمد حقاني په تلاوت پيل شوه؛ ورپسې د مرافعه محکمې رئیس د یادو محاکمو قضائي او اداري کارکوونکو ته د لا ښه اجراآتو په موخه لازمې سپارښتنې وکړې، وروسته يې د محاکمو فيصلې وکتلې او د محاکمو کارکوونکو ته یې د چارو د لا چټکتيا په موخه یو ورځنی سیمینار ورکړ.
د غونډې په دوام د مرافعه محکمې رئيس د محاکمو غړيو ته شته ستونزې ور په ګوته کړې، ترڅو په عالي محاکمو کې فیصلې نقض نشي.
همداراز محترم مولوي عبدالشکور د چپرهار ولسوالۍ د ولسوال او قوماندانۍ له امنیتي مسؤولينو سره په ليدنه کې وویل، د مجرمینو په نیولو کې چټک اجراآت ترسره کړئ، ترڅو په هېواد کې اسلامي نظام بقاء ولري.
د لیدنې په وروستيو کې د یادې ولسوالۍ د مسؤولینو لخوا محترم رئیس ته د ښه راغلاست ترڅنګ ډاډ ورکړل شو، چې د تېر په څېر به د عامه نظم ګډوډوونکي نيسو او عدلي او قضائي ارګانونو ته به يې سپارو.
د مرافعه محکمې رئيس لخوا هم ډاډ ورکړل شو چې اړوند محاکم به يې دوسيو ته پر وخت رسېدنه کوي.
غونډه د ولي محمد حقاني لخوا په دعاء پای ته ورسېده.
