د قضائیه قوې د محاکمو امنیتي او اجرائیوي چارو عمومي ریاست یوه پلاوي د جنوب لوېدیځ زون د نظامي محاکمو له چارو ليدنه وکړه
د قضائیه قوې د محاکمو د امنیتي او اجرائیوي چارو عمومي ریاست اړوند د تفتیش او کنټرول عمومي مدیریت شپږ کسیز پلاوي چې مشري یې د یاد مدیریت عمومي مدیر مفتي عبدالرؤف عمري کوله، د روان ۱۴۴۶هـ ق کال د جمادی الأولی میاشتې له لومړۍ نېټې څخه تر څلورمې نېټې پورې د جنوب لوېدیځ زون د نظامي محاکمو د امنیتي او اجرائیوي قطعاتو او د ملکي محاکمو د امنیتي قطعاتو له چارو لیدنه او څارنه وکړه.
د یاد ریاست د تفتیش او کنټرول مدیریت پلاوي په دې لیدنه کې د جنوب لوېدېځ زون اړوند هرات، فراه، نیمروز او بادغیس ولایتونو د نظامي محاکمو د امنیتي او اجرائیوي قطعاتو او د ملکي محاکمو د امنیتي قطعاتو له چارو، د عالیقدر امیرالمؤمنین (حفظهالله) د فرمانونو، د ریاست الوزراء محترم مقام او سترې محکمې د هدایاتو د تطبیق، د مجاهدینو له تعیناتو، اداري او امنیتي چارو، د توقیف خونو امنیت تأمینولو، اکمال او توزېع، د پرسونل له حاضرۍ، ۲۴ ساعته نوکریوالۍ د تطبیق، د پیره دارۍ له ځایونو او نورو اړوند مواردو څخه کنټرول او څارنه وکړه.
دغه راز یاد پلاوي مجاهدینو ته د صورت او سیرت د اصلاح، پر نبوي سنتو د ځان برابرولو، په جماعت سره د لمانځه ادا کولو او خپلو دندو ته د پاملرنې په برخه کې د لازمو لارښوونو او سپارښتنو تر څنګ مجاهدینو ته د دوی د ښه خدمت کولو په موخه ځانګړي ستاینلیکونه او نغدي ډالۍ ورکړې او په راتلونکي کې یې د لا ښه خدمت کولو په موخه مشورې ورکړل شوې.
د یادونې وړ ده چې یاد پلاوي د محاکمو له رئیسانو، والیانو، د استخباراتو له رئیسانو او امنیه قوماندانانو، سره د همغږۍ، يووالي او همکاريو د لا ټینګښت لپاره اړینې ناستې وکړې.
