د کابل ولایت د مرافعه محکمې مرستیال د ښاري ابتدائیه محکمې له دویم زون څخه لیدنه وکړه
د کابل ولایت د مرافعه محکمې مرستیال محترم مولوي محمد مبین (الطاف) د روان ۱۴۴۶ هـ ق کال د رجب المرجب میاشتې په ۲۸مه نېټه، د کابل ښاري ابتدائیه محکمې دویم زون څخه د لیدنې پر مهال د یاد زون له قضائي غړو سره وکتل.
دغه راز محترم مولوي الطاف په دې لیدنه کې د یاد زون د جزا، تجارتي، مدني او امنیت عامه دېوانونو له چارو نظارت وکړ، اداري کتابونه لکه: د واردې او صادري کتاب، د اندراج جزائي او حقوقي کتابونه او د رسیداتو کتاب یې له نږدې وکتل.
د مرافعه محکمې مرستیال د دویم زون قضائي منسوبینو ته په خطاب کې وویل، د مراجعینو چارې په ټاکلي وخت او ښه ډول ترسره کوئ او له دوی سره د اسلامي شریعت د احکامو په رڼا کې چلند کوئ.
دغه راز محترم مولوي محمد بین (الطاف) د هغه کارکوونکو ستاینه وکړه چې خپلې ورځنۍ چارې یې په ښه ډول ترسره کړې وې.
