د بلخ ولايت مرافعه محکمې د نوي رئيس محترم مفتي حفيظ الله (محمدي) د معرفت غونډه وشوه
د بلخ ولايت مرافعه محکمې نوی رئيس محترم مفتي حفيظ الله (محمدی)؛ په ٢٥/ ۱ / ١٤٤٧هـ ق نېټه د يوې غونډې په ترڅ کې د یاد ولايت مرافعه او ښاري ابتدائیه محاکمو د دیوانونو رئیسانو، د وثیقو، سندونو او د حقوقو آمرينو، د تحریراتو رئیس او اداري کارکوونکو ته ور وپېژندل شو.
غونډه د عامه امنیت دېوان رئيس مولوي عبدالسلام (مظهري) لخوا د قرآنکریم د مبارکو آیاتونو په تلاوت پيل شوه؛ ورپسې د مرافعه محکمې نوي رئيس خبرې وکړې وويل، قضاء یو دروند مسؤولیت دی، باید په هېڅ صورت په کې غفلت او بې احتیاطي ونشي.
نوموړي د قضاء پر اهميت او ارزښت هر اړخیز بحث وکړ، ټول قضات او اداري کارکوونکي يې خپلو اړوند دندو ته متوجې کړل، تر څو د دنیوي او اخروي مسؤولیت په نظر کې نیولو سره خپل کارونه په اخلاص، صداقت او ایماندارۍ ترسره او د الله (جلجلاله) رضاء حاصله شي.
دغه راز د مرافعه محکمې رئيس محترم مفتي محمدي د محاکمو مسؤولینو ته په خطاب کې وویل، له مراجعینو سره ښه سلوک وکړئ، د مراجعینو پر شکایتونو باید ښه غور وشي، د دوسیو اجراآت مه ځنډوئ، د خلق الله ستونزو ته په شفاف ډول رسېدنه وکړئ، فیصلې يې مه ځنډوئ، د خپلو امرینو اطاعت وکړئ، ځکه د اسلامي نظام بقاء د امیر په اطاعت کې ده، د یو او بل پر دندو کې مداخله مه کوئ او په رسمي وخت کې خپلو دندو ته ځانونه حاضر کړئ.
د مرافعه محکمې نوي رئيس زیاته کړه، کوم اصول او تعلیماتنامې چې محاکمو ته په واک کې ورکړل شوې، باید موږ اوتاسو ورباندې په سمه توګه عمل وکړو.
د غونډې په دوام د ښاري ابتدائیه محکمې رئيس مولوي محمد ولي (حقاني) خبرې وکړې وويل، تغیر او بدلون د یو نظام او حکومتدارۍ اصل وي، د پخواني رئیس الحاج شیخ محمد ګلاب فاروقي د ریاست او کارونو ستاینه یې وکړه او نوي رئيس ته یې د ښه خدمت کولو او په چارو کې د بریا هيله وکړه.
غونډه د مرافعه محکمې تجارتي دېوان رئيس شیخ فدامحمد (ابوالمنصور) لخوا د دعا په ویلو پای ته ورسېده.
