د سترې محکمې د قضائي تفتیش عمومي ریاست مفتشینو د تخار ولایت له محاکمو او مرکزي زندان څخه لیدنه وکړه
د سترې محکمې د قضائي تفتیش عمومي ریاست یوه مؤظف پلاوي، د محترم مفتي فیض الرحمن (نثار) په مشرۍ، چې مولوي عبدالجبار (شهاب) او مولوي مطیع الحق (اصف) یې غړیتوب درلود، د سترې محکمې عالي مقام په هدایت، د روان ۱۴۴۸هـ ق کال د ربیع الآخر میاشتې په ۲۵مه نېټه، د محاکمو د تېرو فعالیتونو د څېړنې په موخه، تخار ولایت ته سفر وکړ.
یاد هيئت د ليدنې په پیل کې د مرافعه محکمې له رئيس سره وکتل؛ ورپسې يې د بندیانو د ستونزو د څېړلو په موخه د تخار ولایت له مرکزي زندان او توقیفخونې څخه لیدنه وکړه، د یاد محبس او توقیفخونې اړوند نارینهوو، ښځینهوو او ماشومانو بندیانو بشپړ شهرت، کیفیت او اړتیاوې يې له ځان سره یادداشت او وروسته يې له اړوندو محاکمو سره شریکې کړې.
هيئت د خپل کاري پلان له مخې د یاد ولایت (۱۶) ولسوالیو د ابتدائیه محاکمو، د حقوقو مدیريتونو، د ښاري او مرافعه محاکمو اړوند دېوانونو، د اسنادو، مخزن، وثایقو او حقوقو آمریتونو، اختصاصي او نظامي محاکمو څخه جلا جلا لیدنه وکړه.
نوموړي هیئت د پلټنې بهیر په ترڅ کې د یادو محاکمو د قضائي او اداري چارو هر اړخیزه پلټنه وکړه، د محاکمو د قضائي او اداري پرسونل د سلوکي او مسلکي اړخونو معلومات یې واخېستل او د چارو د سمون په برخه کې یې ورته لازمې لارښوونې وکړې.
دغه راز د قضائي تفتیش عمومي ریاست هيئت د محاکمو اړوند شته ستونزې، کاري خنډونه او نېمګړتیاوې له ځان سره یادداشت او په پای کې یې د ستونزو د حل، د خنډونو له منځه وړلو او د نېمګړتیاوو د اکمال په اړه د تخار ولایت د مرافعه محکمې له مقام سره تفاهمي ناسته وکړه او اړوند موارد يې په جلا جلا توګه ورسره شريک کړل.
د پلټنې هيئت د خپل سفر په جریان کې د یاد ولایت د ولسوالیو له ځينو مسئولینو سره هم ناستې وکړې او د محاکمو د فعالیتونو د لا ښه پرمختګ او ځينو اړونده ستونزو د حل په موخه يې د هغوی نظرونه واورېدل.
د سترې محکمې د قضائي تفتیش عمومي ریاست هیئت له لاسته راوړنو ډک دغه سفر د ۱۴۴۸هـ ق کال د جمادی الأولی میاشتې په ۱۶مه نېټه پای ته ورسېد.
