محترم مولوي واحدالله (صديقي) د کابل ښاري ابتدائیه محکمې دویم زون د سرپرست رئیس په توګه معرفي شو
د کابل ښاري ابتدائیه محکمې دویم زون سرپرست رئیس محترم مولوي واحد الله (صدیقي) په ۹/ ۱۰/ ۱۴۴۶ هـ ق نېټه د کابل ولایت مرافعه محکمې مدني دېوان رئیس محترم مولوي عبدالله (اسرار) لخوا د یوې غونډي په ترڅ کې د یاد زون قضائي او اداري مسؤولینو او منسوبینو ته معرفي او رسما یې خپله دنده پیل کړه.
په همدې موخه جوړه شوې غونډه کې د کابل ولایت مرافعه محکمې مدني دېوان رئیس، د کابل ښاري ابتدائیه محکمې د لومړي او درېیم زونونو عمومي رئیسانو، د دویم زون د دېوانونو قضائي غړو او کارکوونکو ګډون درلود.
غونډه د قرآنکریم د څو مبارکو آیاتونو په تلاوت پیل شوه؛ ورپسې د کابل ښاري ابتدائیه محکمې لومړي زون رئیس محترم مولوي عبدالبصیر (مصعب) لخوا د نوي سرپرست رئیس د معرفي کېدو مکتوب د غونډې ګډونوالو ته ولوستل شو.
د غونډي په دوام محترم مصعب وویل، الحمدلله ټول قضائي غړي د ښو تجربو خاوندان دي، اړونده چارې په ښه ډول روانې دي، د کابل ښاري ابتدائیه محکمې څلور زونونه په ښه همغږۍ خپل کارونه ترسره کوي او د اړتیا پر مهال له یو او بل سره همکار وي.
د غونډې په وروستيو کې د دویم زون نوي سرپرست رئیس خبرې وکړې وویل، زموږ موخه خپلو خلکو او نظام ته خدمت دی، که د مشرتابه لخوا د افغانستان په هره سیمه کې مسؤولیت راکړل شي ان شاءالله ښه په اخلاص به یې ترسره کوو.
غونډه د دعا په ویلو پای ته ورسېده.
