د سترې محکمې د امنیتي او اجرائیوي چارو ریاست اړوند د (۳۴) ولایتونو د نظامي محاکمو د امنیتي او اجرائیوي او د ملکي محاکمو د امنیتي قطعاتو له چارو لیدنه او څارنه وشوه
د سترې محکمې عالي مقام د حکم په اساس د قضائي تفتيش عمومي رياست د قضائي غړي محترم مولوي سیف الله (ذاکر) په مشرۍ د قضائي تفتیش عمومي ریاست او د سترې محکمې امنیتي او اجرائیوي چارو ریاست ګډ پنځه کسیز پلاوي چې د نظامي محاکمو د امنیتي او اجرائیوي قطعاتو قوماندان حاجي حافظ حکمت الله (آغا ذهین) او د ملکي محاکمو د امنیتي قطعاتو قوماندان الحاج مولوي عبدالله (عزام) یې غړیتوب درلود، د روان ۱۴۴۷ هـ ق کال د محرم الحرام د میاشتې په لومړۍ نېټه د افغانستان د ۳۴ ولایتونو د نظامي محاکمو د امنیتي او اجرائیوي قطعاتو او د ملکي محاکمو د امنیتي قطعاتو له چارو لیدنه او څارنه پیل کړه.
یاد پلاوي د خپلو سفرو په جریان کې د نظامي محاکمو د امنیتي او اجرائیوي قطعاتو او د ملکي محاکمو د امنیتي قطعاتو د مرافعه، نظامي او ښاري ابتدائیه محاکمو د عمومي رئیسانو او مجاهدینو ترمنځ د همغږۍ او یووالي د لا ټینګښت په پار دوی ته هر اړخیزې او تفصیلي خبرې وکړې او مجاهدین یې اطاعت ته را وبلل، د وسلو د ثبت له کتابونو او اړوند ډیټابیس او نورو لازمو مواردو څخه یې څارنه او لیدنه وکړه.
دغه راز یاد پلاوي مجاهدینو ته د صورت او سیرت د اصلاح ، پر نبوي سنتو د ځان برابرولو، يووالي او ورورولۍ د ټينګښت، خپلو دندو ته د پاملرنې او پر وخت رسېدنې په برخه کې د لازمو لارښوونو او سپارښتنو تر څنګ مجاهدین د امیرانو اطاعت، د علماء کرامو قدردانۍ، له مراجعینو سره نېک چلند، له وخت څخه سالمې استفادې، کار اهل ته سپارلو او امانتدارۍ ته وهڅول.
د یادونې وړ ده چې یاد پلاوي د محاکمو له رئیسانو او اړونده امنیتي قوماندانانو سره د دوی د ستونزو د اورېدو په موخه انفرادي او مشترکې ناستې ترسره کړې.
یاد سفر د روان ۱۴۴۷ هـ ق کال د ربیع الأول میاشتې په ۲۷ نېټه په داسې حال کې چې له لاسته راوړنو ډک و؛ پای ته ورسېد.
