د کابل مرافعه محکمه کې «په څرخي پله زندان کې د توقیف شوو کسانو برخلیک» تر عنوان لاندې غونډه وشوه
د یکشنبې په ورځ (۲۱/۳/۱۴۴۴هـ ق) نېټه د کابل ولایت د مرافعه محکمې د عمومي رئیس محترم مولوي عبدالغفار (رحماني) په مشرۍ په څرخي پله زندان کې د توقیف شویو کسانو د برخلیک په تړاو غونډه ترسره شوه.
په دې غونډه کې چې د کابل په مرافعه محکمه کې ترسره شوه د مرافعه محکمې د دېوانونو رئیسانو، د کابل ولایت د ابتدائیه محاکمو د څلورو زونونو رئیسانو، د مخدره موادو محکمې رئیس او د ولسوالیو ابتدائیه محاکمو رئیسانو ګډون کړی و.
د غونډې په پیل کې د مرافعه محکمې عمومي رئیس محترم مولوي عبدالغفار (رحماني) ګډون کوونکو تر هرکلي وروسته وویل، لکه څنګه چې تاسو خبر یاست د څرخي پله زندان مسؤولینو د افغانستان اسلامي امارت د سترې محکمې عالي مقام ته په یاد زندان کې د توقیف شویو کسانو د برخلیک څرګندولو په هکله راپور لېږلی و.
موږ د سترې محکمې د عالي مقام په هدایت نننۍ ناسته جوړه کړې چې د یاد راپور د محتوا په اړه بحث وکړو.
د استیناف محکمې محترم رئیس د غونډې ګډونوالو ته د څرخي پله زندان بشپړ راپور واضح او ولوست، د غونډې له ګډونوالو څخه یې د توقیف شوو کسانو د بې برخلیکتوب لاملونه وغوښتل.
وروسته د ناستې ګډون کوونکو په خپل وارسره داسې وضاحت او څرګندونې وکړې:
- کوم راپور چې د څرخي پله زندان څخه د زندانیانو د بې برخلیکتوب په اړه سترې محکمې عالي مقام ته استول شوی دی تر ډېره ناسم دی. د ډېری هغو کسانو چې په راپور کې یې نومونه یاد شوي دوسیې تر کار لاندې دي.
- د ځینې کسانو دوسیې د جنایي تحقیقاتو ریاست لخوا په ټاکلي وخت مونږ ته نه استول کیږي، کومې دوسیې چې استول کیږي ځينی یې تحقیقاتي نیمګړتیاوې لري، چې له همدې وجې د توقیف شوو کسانو برخلیک معلومول له ځنډ سره مخ کېږي.
- دوسیې ډېرې دي او جزائي دوسیو ته په اونۍ کې د مهالوېش سره سم کم وخت ورکړل شوی دی، چې په راتلونکې کې به ان شاء الله جزائي دوسیو ته د رسېدنې وخت ډېر کړو.
د کابل د استیناف محکمې محترم رئیس د غونډې د ګډونوالو تر خبرو اورېدو وروسته رئیسانو ته هدایت وکړ چې د زونونو، ښاري محاکم او د ولسوالیو محاکم دې د څرخي پله زندانیانو هغه دوسیې چې تر کار لاندې دي او په هکله یې غونډې ترسره شوې دي، خو څرخي پله زندان مسئوولینو د هغوی د بې برخلیکتوب راپور استولی دی، د اجراآتو کاپي دې یې د مرافعه محکمې عمومي ریاست ته واستوي ترڅو د سترې محکمې عالی مقام ته واستول شي.
د کابل د استیناف محکمې رئیس زیاته کړه، د محاکمو ټول رئیسان باید د جنائي تحقیقاتو د ریاست له مسؤولینو سره په دې هلکه د همغږۍ غونډې ترسره کړي.
نوموړي په ډاګه کړه چې قاضي په خپلو پرېکړو او ټولو قضائي اجراآتو کې مستقل دی، هېچاته دې اجازه نه ورکوي چې د قضا په اجراآتو کې لاسوهنه وکړي.
دغه راز د کابل د استیناف محکمې محترم رئیس ټینګار وکړ چې د کابل ولایت د محاکمو ټول رئیسان باید په میاشت کې یو ځل د همغږۍ ناسته وکړي.
غونډه د دعاء په ویلو سره پای ته ورسېده.
