د هلمند ولایت مارجې ولسوالۍ ابتدائیه محکمې د مسؤولينو په هڅو د قتل موضوع حل او فصل شوه
د هلمند ولايت مارجې ولسوالۍ ابتدائیه محکمې د مسؤولينو په ډېرو هڅو او ترغيب، د قومي مشرانو او سپينږېرو په منځګړيتوب په ۷/۱/۱۴۴۷هـ ق نېټه د دوو کورنيو ترمنځ د قتل او ټپي کېدو موضوع د سولې له لارې حل او فصل شوه.
د یوې مېرمنې د وژل کېدو او درېیو کسانو د ټپي کېدو دغه موضوع، اته میاشتې مخکې په مارجه ولسوالۍ کې رامنځته شوې وه او ابتدائیه محکمې ته تر راجع کېدو وروسته په ډېر غور او دقت وڅېړل شوه.
یاده موضوع په يوه اصلاحي غونډه کې چې قومي مشرانو هم په کې ګډون درلود؛ د مقتول د وارثینو لخوا له قاتل څخه د دیت په اخیستو حل او رسماً پای ته ورسېده.
د غونډې په وروستيو کې دواړو لوریو له مسؤولينو مننه وکړه، په دې پرېکړه یې رضایت او خوښي څرګنده کړه او د محاکمو د مسؤولینو د هڅو ستاينه يې وکړه.
