د کابل ولایت مرافعه محکمې رئيس د ښاري ابتدائیه محکمې څلورو زونونو له آمرینو سره غونډه وکړه

د کابل ولايت مرافعه محکمې عمومي رئیس محترم ذبېح الله (ساجد) په مشرۍ؛ د مرافعه محکمې د تحریراتو رئیس، عمومي مدیر او د کابل ښار د څلورو زونونو آمرینو په ګډون، په ۱/ ۷/ ۱۴۴۷ هـ ق نېټه غونډه وشوه.
د غونډې په پيل کې د محاکمو ترمنځ د اداري همغږۍ، قضائي چارو د ښه مدیریت او دوسیو ته د ژر رسېدو په اړه بحث وشو. 
د مرافعه محکمې عمومي رئیس د ابتدائیه محکمې د څلورو زونونو  آمرینو ته هدایت ورکړ چې خپلو مسؤولیتونو ته ښه متوجه شي.
د غونډې په دوام ګډونوالو دوسیو ته د رسېدنې د څرنګوالي په اړه خپل نظرونه شریک کړل.
د مرافعه محکمې رئیس وویل، دوسیو ته په چټکه توګه رسېدنه او د محاکمو ترمنځ همغږي د خلکو د باور د لوړولو لپاره حیاتي ارزښت لري.
په غونډه کې د شفافیت، قضائي نظام د تاثیراتو او د خلکو ستونزو د حل لپاره د ګډو هڅو پر اړتیا ټینګار وشو.