د فراه ولایت مرافعې محکمې رئیس د یاد ولایت د شپږو ولسوالیو له ابتدائیه محاکمو څخه لیدنه وکړه
د فراه ولايت مرافعې محکمې عمومي رئیس محترم شیخ غلام رسول (احساني)؛ د جزا دېوان رئيس مولوي محمد اسماعیل (منصور)، د تحريراتو آمر مولوي شفیعالله (مدثر) او د امنيتي قطعې قوماندان ملا مولاداد (ابوالاسد) په ملتیا د ۱۴۴۷ هـ ق کال د ربیع الآخر میاشتې په ۴مه او ۵مه نېټه د یاد ولایت د جوین، شیبکوه، پشتکوه، اناردرې، خاکسفید او پشترود ولسواليو له ابتدائیه محاکمو څخه لیدنه وکړه.
یاد پلاوي په قضائي برخه کې د حقوقي او جزائي قرارونو، دوسیو او په اداري برخه کې د حاضرۍ، د عریضو د ثبت، حقوقي او جزائي اندراجونو، صادره او وارده اسنادو څېړنه وکړه او د لا زیات سمون او ښهوالي لپاره یې مسؤولینو ته اړینې لارښوونې وکړې.
دغه راز یاد پلاوي د ولسوالیو د بندیانو په اړه پوښتنې وکړې، د قضائي غړو او نورو مسؤولینو ترمنځ د همغږۍ او همکارۍ وضعیت ارزونه یې وکړه، له نېکه مرغه د یادو ولسوالیو د قضائي او اجرائیوي مسؤولینو ترمنځ پوره همغږي او همکاري موجوده وه.
