د سترې محکمې د قضائي تفتیش عمومي ریاست د ۱۴۴۷ هـ ق کال د لومړۍ ربعې لنډ راپور
د سترې محکمې قضائي تفتیش عمومي ریاست د ۱۴۴۷هـ ق کال په لومړۍ ربعه کې لاندې مهم فعاليتونه ترسره کړي دي:
- د سترې محکمې د قضائي تفتیش عمومي ریاست د ۱۴۴۷هـ ق کال په لومړۍ ربعه کې د قضائي اجراآتو د ارزونې په موخه، د فاریاب، بدخشان، بامیان او نورستان ولایتونو له زندانونو څخه لیدنه او نظارت ترسره کړی او د ټولو بندیانو د وضعیت او اړتیاوو په اړه یې له دوی سره خبرې کړې دي.
- د ۱۴۴۷هـ ق کال په لومړۍ ربعه کې د مرکزي او ولایتي محاکمو له اجراآتو څخه د اصحاب دعوی د شکایتونو په تړاو (۱۷۹) اقتضائي موضوعات دغه ریاست ته راجع شوي، چې له دې ډلې (۱۳۷) قضیې څېړل شوې او اړوند راپورونه د سترې محکمې عالي مقام ته استول شوي دي، پاتې (۴۲) دوسیې لا هم د قضائي مفتشینو تر څېړنې لاندې دي.
- د ۱۴۴۷هـ ق کال د لومړۍ ربعې په جریان کې، د ولایاتو د محاکمو کلني او ربعوار راپورونه چې د پلان او پالیسۍ ریاست ته استول شوي وو، د محاکمو د عادي اجراآتو د څېړنې په ترڅ کې د قضائي مفتشینو لخوا وڅېړل شول.
- د ۱۴۴۷هـ ق کال د لومړۍ ربعې په جریان کې، د یو واحد قضائي سلوک او په محکمو کې د سالمو کړنو د ترسره کولو په موخه، د سترې محکمې د عالي مقام د حکمونو، اصولو، مقرراتو او تصویبونو په نظر کې نیولو سره، د فاریاب، نورستان، بدخشان او بامیانو ولایتونو قاضیانو او اداري کارکوونکو ته لازمې لارښوونې وشوې.
- د ۱۴۴۷هـ ق کال د لومړۍ ربعې په جریان کې، د قضائي او اداري منسوبینو د عادي اجراآتو د څېړنې په جریان کې چې د هغوى وړتيا، اهلیت، زيار او لياقت په کې څرګند شوي دي، د قضائي مفتشینو له طرفه په لوړ بست کې د دوی د تقرر وړاندیزونه د سترې محکمې عالي مقام ته وړاندې شوي دي.
- د ۱۴۴۷هـ ق کال د لومړۍ ربعې په جریان کې، په اسلامي امارت او محاکمو باندې د خلکو اعتماد زیاتولو او له مراجعینو او نورو امارتي ادارو سره د ښه چلند برخو ته جدي پاملرنه شوې او مسؤولینو ته جدي او لازمې لارښووني شوې چې د خلکو شکایتونو ته رسېدنه پر خپل وخت او د اصولو مطابق وکړي، سربېره پر دې، له هغو مراجعینو څخه چې د ستونزو د حل په موخه محاکمو ته حاضر شوي وو، معلومات هم ترلاسه شوي، ترڅو وڅېړل شي چې د محاکمو منسوبین ورسره څه ډول چلند کوي.
- د ۱۴۴۷هـ ق کال د لومړۍ ربعې په جریان کې، د یو شمېر محاکمو عادي کړنې وڅېړل شوې، ترڅو هغه قاضیان او مامورین تشخیص شي چې د صداقت، ژمنتیا او مسلکي پوهې له مخې وړتیا لري او د لا زیاتو مسلکي زده کړو اړتیا لري؛ د یادو څېړنو پر بنسټ راپورونه ترتیب او د بعدي اقداماتو لپاره د سترې محکمې عالي مقام ته واستول شول، څو له مخې یې د یادو کسانو د ظرفیت لوړونې په موخه لازم تصمیمونه ونیول شي.
- د ۱۴۴۷هـ ق کال د لومړۍ ربعې په جریان کې، د نورستان، بامیان، فاریاب، بدخشان محاکمو د قضائي او اداري مسؤولینو کړنې وڅېړل شوې، په یاده څېړنه کې هغه نواقص چې کم وو، د محاکمو له مقرراتو او مصوباتو سره سم د مفتشینو لخوا ورته لازمې توصیې او لارښوونې وشوې او هغه نواقصات چې زیات وو، راپورونه یې د بعدي هدایت لپاره د سترې محکمې عالي مقام ته واستول شول.
- د قضائي تفتیش عمومي ریاست له وظایفو څخه د سترې محکمې عالي شورا مصوباتو، مقرراتو، لوایحو او طرزالعملونو دوامدار نظارت کول دي، چې د مفتیشینو لخوا په لومړۍ ربعه کې یاد نظارت ترسره شوی دی.
- د ۱۴۴۷هـ ق کال د لومړۍ ربعې په جریان کې، د قضائي مفتشینو له لوري د فاریاب، بامیان، بدخشان او نورستان ولایتونو د قضائي او اداري مسؤولینو عادي او اقتضائي ستونزې تشخیص او د حل په موخه يې راپور د بعدي هدایت لپاره د سترې محکمې عالي مقام ته واستول شو.
- د ۱۴۴۷هـ ق کال د لومړۍ ربعې په جریان کې، قضائي مفتشینو د محاکمو او استوګنې ودانیو له فزیکي وضیعت څخه لیدنه وکړه او د یو شمېر ودانیو د ترمیم په هکله یې خپل راپور د بعدي هدایت لپاره د سترې محکمې عالي مقام ته واستوو.
