د کابل ولايت قره باغ ولسوالۍ ابتدائيه محکمې د مسؤولينو په هڅو د قتل موضوع حل او فصل شوه
د کابل ولایت مرافعه محکمې اړوند، قره باغ ولسوالۍ ابتدائیه محکمې سرپرست رئیس مفتي محمد هاشم (الهام) په ډېرو هڅو او د قومي مشرانو په منځګړیتوب په ۲ /۹ /۱۴۴۶ هـ ق نېټه د قتل موضوع حل او فصل شوه.
یاده موضوع چې څه موده وړاندې د قره باغ ولسوالۍ اړوند د قلعه باز په کلي کې د یو ځایي اوسیدونکي د قتل له امله رامنځته شوې وه؛ محکمې ته تر راجع کېدو وروسته په غور وڅېړل شوه.
ورپسې د ابتدائيه محکمې مسؤولينو د مقتول کورنۍ د قاتل بخښنې ته وهڅوله، له ډېرو هڅو او ترغیب وروسته د مقتول وارثينو بخښنې ته غاړه کېښوده.
یاده موضوع د مقتول کورنۍ تر رضایت وروسته د يوې غونډې په ترڅ کې چې قومي مشرانو او سپینږیرو هم په کې ګډون درلود؛ د قاتل په بخښنې سره په رسمي ډول پای ته ورسېده.
