د پکتیکا د مرافعه محکمې رئیس د ښاري محکمې له قضائي او اداري کارکوونکو سره ناسته وکړه
د پکتیکا ولایت د استیناف محکمې رئیس د روان ۱۴۴۴ هجري قمري کال د رمضان میاشتې په ۱۹مه نېټه د یاد ولایت د ښاري محکمې د قضاتو او اداري کارکوونکو تر منځ د رسمي چارو د لاښه والي او پرمختګ په موخه اداري ناسته وکړه.
یاده اداري ناسته چې د استیناف محکمې د رئیس محترم الحاج مفتي عبیدالله «خالد» په مشرۍ جوړه شوې وه او د ښاري محکمې رئیس محترم مولوي محمد اشرف«ابوخالد» او ټولو قضاتو په کې ګډون درلود د ښاري محکمې د جزاء دېوان د عضو مفتي محترم مولوي عبدالله «عمري» لخوا د قرآنکریم د مبارکو آیاتونو په تلاوت پیل شوه.
ورپسې د استیناف محکمې عمومي رئیس الحاج مفتي عبیدالله«خالد» د ناستې ګډونوالو ته د تقوا، حاضرۍ ته پر پابندۍ او د قضاء اړوند چارو کې د اخلاص او صداقت په اړه تفصیلي وینا او لازمې سپارښتنې وکړې.
د استیناف محکمې رئیس وویل، واردو شویو قضیو ته باید په ټاکلي وخت رسېدنه وشي او له کوم شرعي عذر څخه پرته د خلکو په دوسیو کې ځنډ رانشي ترڅو پر محاکمو د خلکو د باور فضاء لا ډېره او د بېځایه تکلیف مخنیوي یې شوی وي.
ورپسې د ناستې ګډونوالو په خپل نوبت د کارونو د لاښه تنظیم، ستونزو او مشکلاتو ته په وخت سره د رسېدنې په اړه خبرې وکړې.
هغه ستونزې چې په ناسته کې بیان شوې الحمدلله تر ډېره حده ورته رسېدنه وشوه.
د استیناف محکمې رئیس د ناستې ګډونوالو ته ډاډ ورکړ چې د چارو د لابهبود په موخه به د دوی پر هر ډول اصولي غوښتنو غور کوي، د سترې محکمې له عالي مقام سره به یې شریکوي.
یاده اداري ناسته د ښاري محکمې د مدني او حقوقي دېوان د عضو مفتي شیخ مولوي رحیم الله «فضلي» لخوا په اختتامیه دعا سره پای ته ورسېده.
