د کابل ولايت د استالف ولسوالۍ د ابتدائيه محکمې لخوا د حقوقو مدیريت کارکوونکو او عريضه ليکونکو ته سيمينار جوړ شو
د کابل ولایت د استالف ولسوالۍ د ابتدائیه محکمې د رئیس مولوي عبدالغفور (امین) په مشرۍ د یادې ولسوالۍ د حقوقو مدیریت کارکوونکو او عریضه لیکوونکو ته په ۷/ ۴/ ۱۴۴۶ هـ ق نېټه د معیاري عریضو لیکلو په موخه یو ورځنی سيمينار جوړ شو.
سیمینار د قرآن عظیم الشان د څو مبارکو آیاتونو په تلاوت پیل شو؛ ورپسې د یادې محکمې محترم رئیس لخوا د مراجعينو د ستونزو د حل په موخه عریضه لیکونکو ته د عریضې د لیکلو ټول عام او ځانګړي شرطونه تشرېح شول، هدایت ورکړل شو چې له دې وروسته باید ناسمې عریضې ونه لیکي.
دغه راز د یادې محکمې رئیس د حقوقو مدیریت کارکوونکو ته هم هدايت وکړ چې له مراجعینو دې صحیح لیکل شوې عریضې اخلي.
په دغه يو ورځيني سيمينار کې د مسؤولينو لخوا د اسلامي امارت اداري اصولنامې ۳۳مه ماده په واضحه توګه تشرېح شوه او د غونډې ګډونوالو ته وویل شول چې له مراجعینو سره دې ښه چلند کوي او د خلکو د سرګردانۍ څخه دې تر خپل وسه مخنیوی کوي.
د غونډې په وروستيو کې عریضه لیکونکو د یادې محکمې مسؤولينو ته خپلې ستونزې وړاندې کړې او د یادې محکمې د مسؤولينو لخوا ورته د حللارې په ګوته شوې.
د سيمينار موخه د ناسمو عریضو لیکلو له امله د مراجعینو دوسیو ته د رسېدو برخه کې د ځنډ مخنیوی او هېوادوالو ستونزو او دوسيو ته پر خپل وخت رسېدنه وه.
یاد سيمينار د دعا په ویلو پای ته ورسېد.
