د سترې محکمې محترم رئیس او قاضي القضات خوست ولایت ته سفر وکړ

د سترې محکمې رئيس او قاضي القضات محترم شيخ عبدالحکيم (حقاني) صاحب د یو پلاوي په ملتیا په ۵/ ۱۱/ ۱۴۴۶ هـ ق نېټه خوست ولایت ته سفر وکړ.
محترم شیخ عبدالحکیم (حقاني) صاحب په دغه سفر کې د خوست ولایت د مرافعه محکمې عمومي رئیس او اړوند محاکمو له قضاتو، مفتیانو، محررینو د یاد ولایت له محترم والي، د علماوو شورا، د امر بالمعروف، نهی عن المنکر او شکاياتو اورېدو او د استخباراتو رئیسانو او امنیه قوماندانۍ له مسؤولینو سره وکتل.
د لیدنې په پیل کې د مرافعه محکمې رئیس الحاج مفتي امین الله (منیب) د یاد ولايت محاکمو د قضائي غړو په استازیتوب راغلي لوړ پوړي پلاوي ته ښه راغلاست ووایه او د یاد ولایت د محاکمو د فعالیتونو، د بندیانو د وضعیت ارزونې او له نورو عدلي او قضائي ارګانونو سره د همغږۍ په اړه یې محترم شیخ صاحب ته معلومات ورکړل.
 ورپسې د سترې محکمې محترم رئيس او قاضي القضات خبرې وکړې او د قضاء په اړه یې خپلې توصیې د محاکمو مسؤولینو سره شریکې کړې وویل، د مرافعه محکمې قضائي غړي دې د ابتدائیه محاکمو له قضائي غړو سره په قضائي او اداري چارو کې ښې اړیکې ولري، ابتدائیه محاکم دې هڅه او کوښښ کوي چې د خلکو موضوعات د شریعت، اصولو، فرامینو او متحدالمآلونو مطابق حل او فصل کړي، ترڅو صادرې شوې فیصلې د لوړو محاکمو له خوا نقض نشي.
محترم شیخ صاحب ټینګار وکړ چې قضات دې د مراجعینو سره نېک چلند کوي، ترڅو مراجعین له محاکمو څخه متنفره نشي.
د ليدنې په وروستيو کې د مرافعه محکمې رئیس محترم شیخ صاحب ته بشپړ ډاډ ورکړ، چې ټولو دوسیو ته پر وخت رسېدنه شوې، د قضاتو ترمنځ مینه، اتحاد، یووالی او همغږي شتون لري او په ټول توان سره د قضیو د حل او فصل لپاره هڅه کوي.
 د یادونې وړ ده چې په دې سفر کې د سترې محکمې محترم رئيس او قاضي القضات سره د سترې محکمې اداري مرستيال محترم شیخ عبدالمالک (حقاني)، د سترې محکمې نظامي مرستیال محترم شیخ خیرجان (خیرخواه)، د سترې محکمې د دارالانشاء عمومي ریاست رئیس محترم مفتي عبدالرشید (سعید) او د سترې محکمې د پلان او پاليسۍ ریاست رئیس محترم مولوي محمد جمعه (فیضاني) ملتیا کوله.