د سترې محکمې د جزا دېوان عمومي رئیس د جوزجان او فاریاب ولایتونو له ټولو ولایتي مسؤولینو سره د همغږۍ غونډه ترسره کړه
د سترې محکمې د رئیس او قاضي القضات محترم شیخ عبدالحکیم (حقاني) صاحب په ځانګړي هدایت د سترې محکمې د جزا دېوان عمومي رئیس محترم مفتي عتیق الله (دروېش) د مفتي عبدالحی (شاکر) په ملتیا د روان ۱۴۴۵ هـ ق کال د جمادی الثانیه میاشتې په اوومه او نهمه نېټه د خپلو ولایتي سفرونو په دوام دا ځل د فاریاب او جوزجان ولایتونو د والي صاحبانو په ګډون د ټولو ولایتي ادارو له مسؤولینو سره د همغږۍ غونډې ترسرې کړې.
یادې غونډې د قرآنکریم د مبارکو آیاتونو په تلاوت پیل شوې، ورپسې د سترې محکمې د جزا دېوان عمومي رئیس محترم مفتي عتیق الله (دروېش) صاحب د غونډو ګډونوالو ته د دې غونډو موخې بیان کړې وویل، موږ د سترې محکمې د محترم رئیس او قاضي القضات په ځانګړي هدایت راغلي یو ترڅو د ولایتي ادارو له مسؤولینو سره په تفاهم یو داسې طرزالعمل جوړ کړو چې له مخې یې د ولایتي ادارو ترمنځ همغږي لا ډېره قوي شي.
د جزا دېوان عمومي رئیس د غونډې ګډونوالو ته وویل، د اسلامي نظام هر مسؤول او فرد د واحد هدف (د اسلامي نظام دوام او د الله تعالی پر ځمکه د الله تعالی د قانون تطبیق) لپاره کار کوي، دې موخې ته د رسېدو لپاره اړینه ده چې ټولې امارتي ادارې او مسؤولین په خپلو منځو کې همغږي او همکاري ولري.
نوموړي زیاته کړه، الله تعالی د افغانستان پر مظلوم ملت ځانګړی رحم وکړ او د اسلامي نظام پر نعمت یې ونازول، دغه نظام د مجاهدینو او افغان ولس په ډېرو قربانیو حاکم شوی دی؛ اوس چې الله تعالی موږ ته د خدمت فرصت راکړی نو باید د خپلو هیوادوالو د خدمت په برخه کې نه ستړې کېدونکي هلې ځلې وکړو، له ولس سره ښه چلند وکړو، د خلکو مشکلات واورو او پر ټاکلي وخت یې حل کړو.
دغه راز په یادو غونډو کې د ولایتي ادارو مسؤولینو هم خبرې وکړې؛ د سترې محکمې له محترم رئیس او قاضي القضات څخه یې مننه وکړه چې د همغږۍ د تقویې په موخه یې د سترې محکمې پلاوی ولایتونو ته لېږلی دی.
د غونډو ټولو حاضرینو د همغږۍ دغه ډول ناستې ډېرې ګټورې وبللې او ټینګار یې وکړ چې د دې ناستو په نتیجه کې به کارونو چټک او د خلکو مشکلاتو ته به په ټاکلي وخت رسېدنه وشي.
د یادونې وړ ده چې له دې مخکې هم د سترې محکمې د جزا دېوان د عمومي رئیس په مشرۍ په کابل، بلخ او سرپل ولایتونو کې د همغږۍ ورته غونډې ترسره شوې وې او نورو ولایتونو کې به هم ترسره شي.
