د لغمان د استیناف محکمې رئیس د دغه ولایت د ابتدائیه محاکمو له قضاتو سره وکتل
د لغمان ولایت د استیناف محکمې رئیس محترم مفتي عبدالله (فرقاني) د دوشنبې په ورځ (۲۱/۳/۱۴۴۴ هـ ق) نېټه د دغه ولایت د قرغیو، علینګار او دولت شاه ولسوالیو د ابتدائیه محاکمو له قضاتو سره وکتل.
د استیناف محکمې رئیس په دې لیدنه کې د یادو ولسوالیو قضاتو ته د خپلو کارونو د ښه ترسره کولو لپاره لازم هدایات وکړل، وویل چې د خلکو عرایضو ته دې په ټاکلي وخت رسېدنه وشي، د خلق الله کارونه دې په شفاف ډول په خپل وخت کې حل او فصل شي.
دغه راز د استیناف محکمې رئیس محترم مفتي عبدالله (فرقاني) د اسلامي شریعت پر تطبیق ټینګار وکړ زیاته یې کړه، د افغانستان ځورېدلی ملت چې همیشه یې د اسلامي شریعت د نافذولو لپاره نه ستړې کېدونکې مبارزه کړې ده، باید د دې مبارزې نتیجه او ثمره وویني.
بل خوا محترم مفتي عبدالله (فرقاني) په یاده نېټه د دولت شاه ولسوالۍ له ولسوال قاري متوکل او د قرغیو ولسوالۍ له امنیه قوماندان سره هم ملاقات وکړ.
په دې لیدنو کې دواړو لوریو په اړوند موجوده ستونزو او مشکلاتو بحث وکړ او ژمنه یې وکړه چې د ستونزو د حل په موخه به په اتفاقي شکل هڅې کوي.
