د لغمان د مرافعه محکمې رئیس د علینګار او قرغیو له ابتدائیه محاکمو څخه لیدنه وکړه

د لغمان ولایت د مرافعه محکمې رئیس ښاغلي مفتي عبدالله (فرقاني) د رمضان المبارک د میاشتې په لومړۍ نېټه د علینګار او قرغیو ولسوالیو د ابتدائیه محاکمو د چارو د ارزونې او نظارت په موخه یادو ولسوالیو ته سفر وکړ.

د لغمان د مرافعه محکمې رئیس د دغه سفر پر مهال د علینګار او قرغیو ابتدائیه محاکمو د حاضرۍ کتابونه، اداري او قضائي چارې له نږدې وڅارلې.

ښاغلي مفتي عبدالله (فرقاني) د یادو محاکمو مسؤولینو او منسوبینو ته د خبرو پر مهال وویل، زموږ د دې لیدنو څخه هدف دادی چې قضات خپلو چارو ته متوجه کړو ترڅو په پابندۍ سره خپلو وظیفو ته حاضر شي او خدای مه کړه زموږ ځورېدلي هیوادوال د محاکمو د بندو دروازو تر شا ونه درېږي، د مراجعینو چارې د اسلامي عدالت په رڼا کې په ښه او شفاف ډول ترسره شي.

د مرافعه محکمې د رئیس په خبره، په دې سره به ان شاءالله د هیوادوالو او محاکمو د مراجعینو اوښکې وچې او زړونه به یې ارام شي.