د کابل د مرافعه محکمې رئيس د يوه پلاوي په مشري له یو شمېر ابتدائیه محاکمو لیدنه وکړه
د ۱۴۴۴ هـ. ق کال د ذوالقعدې میاشتې په ۹مه نېټه د کابل ولایت د مرافعه محکمې رئیس محترم مولوي عبدالشکور "رشاد آخندزاده" د مرافعه محکمې د تجارتي دېوان د رئیس ښاغلي مولوي عبدالله "اسرار" او د مرافعه محکمې د عمومي ریاست د تحریراتو د عمومي مدیر ښاغلي عنایت الرحمن "صافي" په ملتیا د دغه ولایت د شکردرې، استالف، کلکان او میربچه کوټ ولسوالیو د ابتدائیه محاکمو له ورځنیو چارو څخه د څارنې او کنټرول په موخه لیدنه وکړه.
د مرافعه محکمې دغه پلاوي د ذوالقعدې په نهمه نېټه د یادو ولسوالیو ابتدائیه محاکمو ته په ورتګ سره د محاکمو د قضائي او اداري چارو تر څېړلو وروسته شته نيمګړتياوې په ګوته او د حل په موخه يې اړوند مسؤولینو ته بشپړې لارښوونې وکړې.
د اجراآتو تر څېړلو وروسته یې په جلا ـ جلا ډول د یادو محاکمو له مسلکي غړو او د حقوقو له مدیرانو سره ناستې وکړې.
په غونډو کې د حقوقو مدیرانو ته لارښوونې وشوې چې خپلې چارې دې له محکمې سره په همغږۍ ترسره کوي او د اړتیا پر مهال دې له محکمې څخه لارښوونه غواړي.
