د کابل مرافعه محکمه کې د دغه ولایت له اړوند محاکمو څخه د ښې څارنې په موخه غونډه ترسره شوه
د ۱۴۴۴ هـ ق کال د شعبان المعظم د میاشتې په ۲۵مه د کابل ولایت د مرافعه محکمې په ریاست کې د دې محکمې د عمومي رئیس ښاغلي مولوي عبدالشکور(رشاد آخندزاده) په مشرۍ او د کابل ښار د ابتدائیه محاکمو د څلورو زونونو د او د تجارتي ابتدائيه محکمې د ښاغلو رئیسانو په ګډون له ښاري او ولسوالیو ابتدائيه محاکمو څخه د ښې څارنې په موخه غونډه ترسره شوه.
په پیل کې د مرافعه محکمې ښاغلي رئیس د غونډې له ګډونوالو څخه د تېرو څارنو د پایلو او ګټو د اظهار غوښته وکړه.
ښاغلو رئیسانو د مرافعه محکمې د رئیس له لوري د ښاري ابتدائیه محکمې د چارو د څارنې بهیر مثبت او ګټور وباله وویل، د مسؤولینو لخوا د ماتحت محاکمو او کارکوونکو د اجراآتو څارنه ډېرې مثبتې اغیزې لري او د دوامداره څارنې غوښتنه يې وکړه.
د غونډې ګډونوالو د خپلو خبرو په دوام کې د ځینو ماهوي او شکلي ستونزو د حل غوښتنه هم وکړه.
د مرافعه محکمې ښاغلي رئیس د ځینو ستونزو د حل لپاره هر اړخیزې لارښوونې وکړې او ځینې ستونزې یې د سترې محکمې څخه د استهداء لپاره له ځان سره یاداښت کړې.
د کابل د مرافعه محکمې رئیس ښاغلي مولوي رشادآخندزاده د مرافعه محکمې د ریاست مقام لخوا د کابل ولایت د ټولو محاکمو څخه د ښې څارنې په موخه د مرافعه محکمې د تجارتي دېوان د رئیس ښاغلي مولوي عبدالله (اسرار) په مشرۍ درېیو کسانو ته د کابل ښار د ابتدائیه محاکمو او د کابل ولایت د استیناف دېوانونو د قضائي چارو د څارنې، د مرافعه محکمې د نظامي دېوان د رئیس ښاغلي مولوي امان الله (حقاني) په مشرۍ درېیو کسانو ته د یادو محاکمو د اداري چارو د څارنې، د ښاري محکمې د څلورو زونونو د ابتدائيه محاکمو ښاغلو رئیسانو، د تجارتي ابتدائیه محکمې ښاغلي رئيس او د مرافعه محکمې د مدني دېوان ښاغلي عضو مفتي ته د کابل ولایت د (۱۴) ولسوالیو د ابتدائیه محاکمو د د چارو د څارنې دنده وسپارله.
د غونډې په پای کې د مرافعه محکمې اړوند محاکمو د چارو د څارنې په موخه جوړو شوو پلاوو ته د څارنې طرزالعمل ورکړل شو.
غونډه د دعا په ویلو سره پای ته ورسېده.
